TALA ndomo Mose a kasi oku tila vofeka Yegito. Ove hẽ wa kũlĩha ulume oyongola oku u kuata ndeti? Eye oyongola oku u kuata oco o ponde. Momo lie? Tu kũlĩhisi ulandu waco.

Mose wa kulila konjo ya Fareo soma Yegito. Eye weya oku kala ulume umue ukualondunge haiye wa velapo. Mose wa kũlĩhile okuti eye ka tiamẽlele kepata lia va Egito. Eye wa tiamẽlele kepata lia va Isareli vana va kala apika.

Eteke limue Mose eci a kuata ci soka akũi akuãla kanyamo, wa enda oku ka kũlĩhisa ndomo va Isareli va kala loku tatiwa. Mose wa limbuka okuti, va Isareli va kala loku tatiwa lãvi. Eye wa mola ulume umue u Egito wa kala loku tipula umue u Isareli. Kuenje wa vanja oku loku. Eci a limbuka okuti ka kua kaile omunu umue, wa tipula ulume waco u Egito toke a fa. Noke wa lembikila etimba liaye veseke.

Komẽle yikuavo, Mose wa enda vali oku kũlĩhisa va Isareli. Eye wa yonguile oku kuatisa va Isareli oco ka va ka linge vali apika. Noke wa mola alume vavali va Isareli va kala oku liyaka. Kuenje wa pulisa una wa tipula ukuavo hati: ‘Nye wa tipuila ukuene?’

Ulume waco wa kumbulula Mose hati: ‘Helie wa ku kapa ndosoma pokati ketu ale onganji yetu? Anga hẽ oyongola oku njipaya ndeci wa ipaya ulume una u Egito?’

Kuenje Mose wa fetika oku kuata usumba. Eye wa limbuka okuti omanu va yeva ovina a linga lulume una u Egito. Eci Fareo a ci yeva,  wa tuma alume oco va ponde Mose. Eli olio esunga lieci Mose a tilila oku tunda vofeka Yegito.

Eci Mose a tunda Kegito, wa enda toke kofeka ya Midiane. Eci a pitila kofeka yaco wa sanga epata lia Yetiro kuenje wa kuela umue pokati komãla vaye vakãi. Onduko yukãi waco Cipora. Mose wa kala lupange woku lisa olomeme via Yetiro. Eye wa kala kofeka ya Midiane ci soka akũi akuãla kanyamo. Noke wa tẽlisa eci ci soka akũi ecelãla kanyamo. Eteke limue Mose eci a kala loku lisa olomeme via Yetiro, wa mola ocina cimue ci komõhisa. Ocina caco ceya oku pongolola omuenyo waye. Tuvula kemẽla likuavo oco o kũlĩhise ocina caco..