KITAA! Napalagiw hi Moises tikang ha Ehipto. Nakikita mo ba an kalalakin-an nga naglalanat ha iya? Maaram ka ba kon kay ano nga karuyag nira patayon hi Moises? Aton usisahon kon kay ano.

Nagdaku hi Moises ha balay ni Paraon, an hadi ha Ehipto. Nagin maaramon ngan dungganon gud hiya. Kondi maaram hi Moises nga diri hiya Ehiptohanon, maaram hiya nga an iya tinuod nga mga kag-anak, Israelita nga mga uripon.

Usa ka adlaw, han 40 anyos hi Moises, nagdesisyon hiya nga kadtoon an iya mga igkasi-Israelita basi hibaroan kon ano an ira kahimtang. Ginpapakurian gud hira. Nakita niya nga ginkakastigo han usa nga Ehiptohanon an Israelita nga uripon. Naglingi-lingi hi Moises ha palibot ngan han maobserbahan niya nga waray iba nga nagkikita, iya ginbunalan an Ehiptohanon ngan namatay ito. Katapos, iginlubong ito ni Moises ha tuna.

Kinabuwasan, ginbisita utro ni Moises an iya mga igkasi-Israelita. Naghunahuna hiya nga mabubuligan niya hira basi diri na magin mga uripon. Kondi nakita niya an duha nga Israelita nga nag-aaway, salit ginpakianhan niya an may sayop: ‘Kay ano nga ginkakastigo mo an imo bugto?’

Binaton an tawo: ‘Hin-o an naghimo ha imo nga prinsipe ngan hukom ha amon? Papatayon mo ba ako sugad han imo ginbuhat ha Ehiptohanon?’

Salit nahadlok hi Moises. Maaram hiya nga hinbaroan na han mga tawo an iya ginbuhat ha Ehiptohanon. Nahibaro na hito bisan hi Paraon, ngan nagsugo hi Paraon hin mga sundalo nga patayon hi Moises. Tungod hito, kinahanglan pumalagiw hi Moises tikang ha Ehipto.

Han binaya hi Moises ha Ehipto, kinadto hiya ha hirayo nga Midian. Didto nakilala ni Moises an pamilya ni Jetro, ngan nagin asawa niya hi Sipora nga usa han mga anak ni Jetro. Nagin magbarantay hiya han kakarnerohan ni Jetro. Nag-ukoy hiya ha Midian ha sulod hin 40 ka tuig. Hini nga panahon, 80 anyos na hiya. Usa ka adlaw, samtang nagbabantay hiya han kakarnerohan, may-ada urusahon nga hitabo nga nakagbag-o han iya bug-os nga kinabuhi. Paklia an sunod nga pahina, ngan aton kitaon kon ano inin urusahon nga hitabo.