AMLOLE Musajo pakutila ku Eguputo. Ana akwawona acalume ŵakum’wutusyawo? Ana akumanyilila ligongo lyakwe akusaka kum’wulaga Musa? Kwende tulole ligongo lyakwe.

Musa ŵakulile ku nyumba ja Falao, jwakulamulila jwa ku Eguputo. Musa ŵaliji jwalunda, soni jwamacili mnope. Musa ŵamanyililaga kuti nganaŵa jwa mtundu wa Aeguputo, nambo kuti acinangolo ŵakwe ŵaliji acikapolo ŵa Ciyisalayeli.

Lisiku line, ali akwete yaka 40, Musa ŵaganisisye yakuja kulola muyajendelaga yindu ŵandu ŵa mtundu wakwe. Jwalakwe ŵayiweni kuti ŵandu ŵa mtundu wakwe ŵatendelaga yindu yakutesya canasa. Ŵam’weni mu Eguputo ali mkumputa kapolo jwa Ciyisalayeli. Musa ŵalolite aku ni akuku, ni kuyiwona kuti paliji pangali jwalijose juŵam’wonaga. Ni jwalakwe ŵamputile mu Eguputojo, mpaka ŵawile. Kaneko Musa ŵasilile mtembowo mumsanga.

Lisiku lyakuyicisya Musa ŵapitesoni kukwalola ŵandu ŵa mtundu wakwe. Jwalakwe ŵaganisyaga kuti mpaka akombolece kwakamucisya ŵanduwo kuti agopoce ku ukapolowo. Nambo ŵaweni acalume ŵaŵili ŵa Ciyisalayeli ali mkuputana, sambano Musa ŵaŵecete kwa jumo jwakulemwajo kuti: ‘Ana ligongo cici mkumputa m’longo mjenu?’

Mundu jula ŵajanjile kuti: ‘Ana nduni jwam’ŵisile mmwejo kuŵa jwakutulamula, soni jwakutujelusya m’weji? Ana mkusaka kumbulaga une mpela yamwatite pakum’wulaga mu Eguputo jula?’

Sambano Musa wamkamwile woga. Jwalakwe ŵayimanyi kuti ŵandu amanyilile yaŵamtesile mu Eguputo jwine jula. Atamose Falao ŵayipikene yinduyi, ni ŵatumisye ŵandu kuti akam’wulaje Musa. Lyeleli ni ligongo lyakwe Musa akutila ku Eguputo.

Paŵatisile ku Eguputo, ŵapite kucilambo cakutalicila ca Midiyani. Ali kweleko ŵasimene ni liŵasa lya Yetelo, ni ŵalombele jumo jwa ŵanace ŵakwe, lina lyakwe Sipola. Musa ŵaliji jwakucinga ngondolo sya Yetelo. Ŵatemi m’cilambo ca Midiyani kwa yaka 40. Sambano ŵaliji akwete yaka 80. Kaneko lisiku line, paŵaliji mkucinga ngondolo sya Yetelo, cindu cakusimonjesya camtendecele cacasindile umi wakwe wosope. Awunukule kusyetoku, kuti alole cindu cakusimonjesyaci.