Historia 29

Xiñee bixooñeʼ Moisés

BIIYAʼ Moisés; cuxooñeʼ de Egipto. Ñee zanda guʼyuʼ cani ladxi laabe ca la? Nannuʼ xiñee nuucabe guuticabe laabe la? Guidúʼyanu pa ganda gánnanu xiñee.

Moisés biniisi ralidxi Faraón, xaíque Egipto. Gúcabe ti hombre nabé nuu xpiaaniʼ ne risaca. Moisés maca nanna cadi egipciu diʼ laa, ne de que cani dxandíʼ bixhózebe la? nácacaʼ esclavu israelita.

Dxi maʼ napa Moisés 40 iza la? guníʼ íquebe chiguuyabe ximodo nuu xquídxibe. Biiyabe cayuninácabe laacaʼ, ne biiyabe ti egipciu caguiñe ti esclavu israelita. Moisés biiyadxí guiráʼ ladu, cumu qué ñuuyabe guirutiʼ tu cayapa raqué la? bininabe laa, ne guti. Moisés bicaachiʼ gueʼtuʼ que lade yuxi.

Sti dxi que yeguuya Moisés xquidxi sti buelta. Ruzulube ñanda ñacanebe laacaʼ para cadi ñácacaʼ esclavu. Peru biiyabe cadinde chupa israelita, óraque Moisés gudxi ni napa donda que: Xiñee caguíñeluʼ bíʼchiluʼ pue.

Hombre que rabi laabe: Tu biʼniʼ lii xaíque ne juez stidu yaʼ. Ñee laaca zuutiluʼ naa casi biitiluʼ egipciu que la?

Óraque la? Moisés bidxibi. Biiyabe maʼ nanna binni xi bíʼnibe egipciu que. Dede Faraón gunna ni ne biseendabe tuudxi hombre chiguuti Moisés. Ngue runi Moisés gupa xidé bixooñeʼ de Egipto.

Ora biree Moisés de Egipto la? guyebe zitu, dede ti guidxi láʼ Madián. Raqué gucabiaʼbe binnilidxi Jetró ne bichaganabe ti xiiñiʼ, láʼ Ziporá. Moisés gupa ca dendxuʼ stiʼ Jetró. Gulézabe cuarenta iza Madián. Yanna, Moisés maʼ napa 80 iza. Ti dxi, laga cayápabe dendxuʼ stiʼ Jetró la? bizaaca ti guendaridxagayaa ni bichaa guidubi xquendanabánibe. Gudiʼdiʼ sti yaza ca, ne guidúʼyanu xii ndiʼ guendaridxagayaa riʼ.

Éxodo 2:11-25; Hechos 7:22-29.