MOSE ba Horeb yoku ɔ he tɔɔ konɛ e ba hla nga kɛ ha e to ɔmɛ. E na mio tso ko nɛ ngɛ tsoe, se e sɛ̃!

Mose de ngɛ e yi mi ke: ‘Mɛni nyakpɛ nɔ́ ji nɛ ɔ? Ma hɛ kɛ su he konɛ ma hyɛ nɔ́ nɛ e ji saminya.’ Benɛ e hɛ kɛ su mio tso ɔ he ɔ, gbi ko je tso ɔ mi de lɛ ke: ‘Koo hɛ mo kɛ su hiɛ ɔ. Je o tokota a, ejakaa zugba klɔuklɔu nɔ o daa si ngɛ ɔ nɛ.’ Mawu ji nɔ nɛ gu bɔfo nɔ kɛ tu munyu ɔ nɛ, lɔɔ heje ɔ, Mose ngɔ e nine kɛ bu e hɛ mi.

Kɛkɛ nɛ Mawu de lɛ ke: ‘I na amanehlu nɛ ye ma a ngɛ nae ngɛ Mizraim ɔ. Lɔɔ he ɔ, ma kpɔ mɛ, nɛ mo ji nɔ nɛ ma tsɔ konɛ o ya nyɛɛ a hɛ mi kɛ je Mizraim.’ Yehowa maa ngɔ e webi ɔmɛ kɛ ba Kanaan zugba nɛ ngɛ fɛu ɔ nɔ.

Se Mose de ke: ‘Pi nɔ ko kulaa ji mi. Nɛ kɛ ma plɛ kɛ tsu enɛ ɔ kɛɛ? Nɛ ke i ya nɛ Israelbi ɔmɛ bi mi ke: “Mɛnɔ tsɔ mo?” ɔ, kɛ ma de mɛ kɛɛ?’

Mawu ha lɛ heto ke: ‘Mo de Israelbi ɔmɛ ke, “YEHOWA, nɛ ji Abraham, Isak kɛ Yakob a Mawu ɔ, ji nɔ nɛ tsɔ mi nyɛ ngɔ.”’ Yehowa de kɛ piɛɛ he ke: ‘Enɛ ɔ ji ye biɛ kɛ yaa neneene.’

Mose kpale bi lɛ ke: ‘Nɛ ke i de mɛ ke mo lɛ o tsɔ mi a ngɔ, nɛ a he we mi yi ɔ nɛɛ?’

Mawu bi lɛ ke: ‘Mɛni o hɛɛ ɔ?’

Mose ha heto ke: ‘Tso.’

Mawu de lɛ ke: ‘Mo sake tso ɔ kɛ fɔ zugba.’ Nɛ benɛ Mose sake tso ɔ kɛ fɔ zugba a, tso ɔ plɛ pee sinɔ. Yehowa kpale pee nyakpɛ nɔ́ ko kɛ tsɔɔ Mose. E de Mose ke: ‘Ngɔɔ o nine kɛ wo o tade ɔ mi.’ Mose ngɔ e nine kɛ wo e tade ɔ mi, nɛ benɛ e je e nine ɔ kpo ɔ, e pee futaa kaa snoo! E nine ɔ pee kaa nɔ nɛ hiɔ yaya nɛ ji kpiti ɔ pue lɛ. Lɔɔ se ɔ, Yehowa ha Mose he wami konɛ e pee nyakpɛ nɔ́ nɛ ji etɛne. Nyagbe ɔ, Yehowa de Mose ke: ‘Ke o pee nyakpɛ ní nɛ ɔmɛ tsuo ɔ, Israelbi ɔmɛ ma he ye kaa imi nɛ i tsɔ mo.’

Lɔɔ se ɔ, Mose ho we mi ya, nɛ e ya de Yetro ke: ‘I kpa mo pɛɛ, ha nɛ ma ya slaa ye wekuli ngɛ Mizraim konɛ ma ya hyɛ bɔnɛ a ngɛ ha.’ Lɔɔ he ɔ, Yetro wo Mose blɔ, kɛkɛ nɛ Mose hia blɔ kɛ ho Mizraim ya.