MOSE yaya ndo ku mulundu wa Horepe, hanga awane yambu yipema yakulisa mapanga jenyi. Kuzekwene iye yamona chimwe chiputa chinakwata kahia, alioze te chiso kuwema!

Hohene Mose yanyonga ngwenyi, ‘Chino chikomokeso. Manguchiheteko hanga nguchitale kanawa.’ Muze hakundamako, muchiputa yimutuhuka limwe liji, yiliamba ngwo: ‘Kanda ukundama kuno. Zula sandalia je ku molu, mumu ha mavu unamana kali asandu.’ Zambi mwe watumine mungelo hanga ahanjike nenyi; kashika Mose yalifuka ku meso jenyi.

Zambi yamba ngwenyi: ‘Yami ngunamono luyinda wa atu jami ali mu Engitu. Kashika yami mungwapulwila, ngunakutumu hanga ufwambwise atu jami mu Engitu. Yehova te kanazange kutwala atu jenyi mu chifuchi chipema cha Kanana.

Alioze Mose yamba ngwenyi: ‘Yami chichi kuchihasa. Kuchi munguhasa kuchilinga? Alioze nyi naya. A-Izalele mamba kuli yami ngwo: “Iya wakutuma?” Yika mungwamba?

Zambi yamukumbulula ngwenyi, ‘Yino ye yena mukamba.’ “‘YEHOVA, Zambi ya Apalahama, Zambi ya Izake, Zambi ya Yakomba mwe wangutuma kuli yenwe.”’ Yehova yaweza nawa ngwenyi: ‘Lino lie jina liami ndo ku miaka ya mutolo.’

Mose yakumbulula ngwenyi, ‘Nyi ngwe ayo kangutayijile ngwo yena mwe wangutuma.’

Zambi yamuhula ngwenyi: ‘Ai yika unakwata ku kwoko lie?

Mose yakumbulula ngwenyi: ‘Mukombo.’

Zambi yamba ngwenyi: ‘Umbile hashi.’ Muze haumbila, mukombo yiwalumuka kapela. Yehova yasolola nawa chikomokeso chikwo kuli Mose. Iye yamba ngwenyi: ‘Njisa kwoko lie muchima lia hina.’ Mose yanjisa, muze halituhwisamo, yilitoma too ngwe mbundu! Kwoko yilipwa ngwe lili ni yikola yize akuvuluka ngwo mbumba. Hazehene Yehova yahana kuli Mose ndundo hanga alinge chikomokeso chikwo chamuchitatu. Mba iye yamba ngwenyi: ‘Muze yena mulinga yikomokeso yeswe ai, A-Izalele makatayiza ngwo Yami mwe nakutuma.’

Mba Mose yaya ku zuwo yalweza Yetoru ngwenyi: ‘Lisesa ngweche kama nguhiluke kuli akwetu mu Engitu ngwatale chize ali.’ Hi iye yalishika ni Yetoru, mba Mose yafuna ku Engitu.