MOIZ i sorti tou sa zistans ziska montanny Oreb pour li rod zerb pour son mouton. La i ti vwar en brousay pe pran dife, me i pa ti pe brile!

‘Sa i drol,’ Moiz ti dir. ‘Mon pou koste pli pre e get pli byen.’ Kan i ti ale, en lavwa sorti dan sa brousay ti dir: ‘Pa apros pli pre. Tir ou sandalet, akoz ou pe debout lo en later sen.’ Se Bondye ki ti pe koz atraver en lanz, alor Moiz ti kouver son figir.

Apre Bondye ti dir: ‘Mon’n vwar soufrans mon pep Lezip. Alor mon pe al delivre zot, e ou, ou sa enn ki mon pou anvoye pour gid mon pep pour sorti Lezip.’ Zeova ti pe al anmenn son pep dan sa zoli pei Kanaan.

Me Moiz ti dir: ‘Mon en nanryen ditou. Konman mon pou kapab fer sa? Me sipoze mon ale. Bann Izraelit pou demann mwan, “Lekel ki’n anvoy ou?” Alor ki mon pou dir?’

‘Se sa ki ou pou dir,’ Bondye ti reponn. ‘ “ZEOVA Bondye Abraam, Bondye Izaak e Bondye Zakob in anvoy mwan kot zot.” ’ E Zeova ti azoute: ‘Sa i mon non pour touzour.’

Moiz ti reponn: ‘Me sipoze zot pa krwar mwan kan mon dir zot ki ou’n anvoy mwan.’

‘Kisisa ki dan ou lanmen?’ Bondye ti demande.

Moiz ti reponn: ‘En baton.’

‘Anvoy li ater,’ Bondye ti dir. E kan Moiz ti anvoye, sa baton ti vin en serpan. Apre Zeova ti montre Moiz en lot mirak. I ti dir: ‘Met ou lanmen dan ou rob.’ Moiz ti mete, e kan i ti retir son lanmen, son lanmen ti’n blan parey lanez! Ou a dir ki i ti’n ganny en maladi ki apel lalep. Apre Zeova ti donn Moiz pouvwar pour fer en trwazyenm mirak. Finalman i ti dir: ‘Kan ou pou fer sa bann mirak bann Izraelit pou krwar ki mon’n anvoy ou.’

Apre sa Moiz ti retourn kot li e i ti dir avek Yitro: ‘Silvouple les mwan retourn kot mon fanmiy Lezip pour vwar konman zot ete.’ Alor Yitro ti dir orevwar Moiz, e Moiz ti konmans son vwayaz pour retourn Lezip.