MOISÉS Horeb yarse owarmasa ovejamarga gagan amigega. Wegine gagan duu gagwissi dagsa, ¡auggine we gagandina gwen gummagsuli!

‘¡Negdargwen an dagge!’, Moisés binsasa. ‘An bur nabbi waligga dagnaoedde’. Walig gusgua, gagan darba dule ega sunmagge iddoali, ega soge: ‘Mer bar be doggus walig gue. Be sanda yoid unge, ar nabba nuedgi be gwissid’. Daggargu ángel bali Babdummad sunmagmai, geb Moisés na wagar gasa odugguega imasa.

Geb Babdummad ega sogsa: ‘An neggwebur Egiptogi sabsur imagledii an dagsa. An na bendaggoe, geb an be barmidoe be wemar onogega’. Jehová na neggwebur sedoe, Canaán neg yeerdaglegedse.

Auggine Moisés abinsogsa: ‘An dule nug niggad sulid. ¿Igi an we ibmar imaggosunna? Ar an nadele anga sogdamaloed: “¿Doa be barmiali?”. ¿Igi an sogosunna?’

Babdummad abinsogsa: ‘Wegi be sogoe: “JEHOVÁ, Abrahán e Babdummadi, Isaac e Babdummadi, geb Jacob e Babdummadi, bemarse an barmialid”’. Uggine, Jehová sogdebali: ‘Wegi an nuga, bibbisaar an nug gwagosuli’.

Moisés abinsogsa: ‘Auggine be an barmiarye an soggalile an iddosurmalardi, ¿igi an saoe?’.

Geb Babdummad ese egidsad: ‘¿Ibu be argangi ganiggi?’.

Moisés abinsogde: ‘An suwar ganiggi’.

Babdummad ega soged: ‘Be suwar nabbag medde’. Moisés deyob imasgua, suwar nagbega binyisa. Degidgi, Jehová, Moisés sega baid ibmar dagledisulid oyosbalid. Babdummad ega soged: ‘Be argan mor yaba be odoge’. Moisés deyob imasa, geb argan onoargua, ¡bela sibudiggi daglege, boo daglege yobi! Wagu boni niggusayob daglege. Degiidgi Jehová, Moisésga gangued ugsa baid ibmar dagledisulid imagbaliga. Nabbis, Jehová ega sogsa: ‘We ibmar dagledisulid be bendaggoed, Israel dulemar be iddomalaga inso ani an be barmiali’.

Sorbali, Moisés gannar e negse nade geb Jetro gala sogsa: ‘Wis be gannar Egiptose an barmide, an gwenadgan dagnaega igi gudimardibe’. Degsoggu Jetro, Moisésga sogsa degimaloye geb Moisés, Egiptose nadsunna.