MOISÉS ouvaʼekue ko montáña Horébpe ohekávo kapiʼipe ijovechakuérape g̃uarã. Koʼápe ohecha peteĩ ñana máta hendýva, péro pe ñana ndokáiri!

‘Mbaʼe piko kóva!’, heʼi Moisés. ‘Tañemoag̃uína ahecha porãve hag̃ua’. Ojapóvo upéva, pe ñana máta guive ohendu peteĩ ñeʼẽ heʼíva: ‘Aníke reñemoag̃uive. Eipeʼa ne sandália, pórke repyrũ yvy sagrádope’. Oñeʼẽ chupe Ñandejára peteĩ ánhel rupive, ha upévare Moisés omoʼã pe hova.

Upéi Ñandejára heʼi: ‘Ahecha che puévlo ohasa asy Egíptope. Aguenohẽta chupekuéra upégui, ha ndéve romondóta upéva rejapo hag̃ua’. Jehová ogueraháta ipuévlope peteĩ tetã iporãvape hérava Canaán.

Péro Moisés heʼi: ‘Che ndahaʼéi mbaʼeve. Mbaʼéicha piko ajapóta upéva? Ha aháramo oporandúta chéve hikuái: “Mávapa nembou?”. Mbaʼépa haʼéta upéicharõ?’.

‘Kóicha eréta chupekuéra’, okontesta Ñandejára. ‘“JEHOVÁ pe Abrahán, Isaac ha Jacob Jára chembou pene rendápe”’. Ha Jehová heʼi avei chupe: ‘Kóva haʼe che réra opa ára g̃uarã’.

‘Péro, haʼekuéra ndogueroviáirõ nde chemondohague?’, okontesta Moisés.

‘Mbaʼépa reguereko nde pópe?’, oporandu chupe Ñandejára.

Moisés okontesta: ‘Peteĩ yvyra’.

‘Eity yvýpe’, heʼi Ñandejára. Ha ojapóvo Moisés upéva, pe yvyrágui oiko peteĩ mbói. Upéi, Jehová ojapo ótro milágro Moiséspe. Heʼi chupe: ‘Epoʼẽ nde ao ryépe’. Moisés ojapo upéva, ha oguenohẽvo ipo, osẽ morotĩmbaite! Haʼete peteĩ oguerekóva lépra. Upe rire Jehová omeʼẽ Moiséspe podér ojapo hag̃ua peteĩ tercer milágro. Ipahaitépe heʼi chupe: ‘Umi isrraelíta ohechávo koʼã milágro ogueroviáta che romondohague’.

Upe rire, Moisés oho jey hógape ha heʼi Jetrópe: ‘Tahami jeýna Egíptope ahecha hag̃ua mbaʼéichapa oiko che hentekuéra’. Upémaramo Jetró ojedespedi chugui, ha Moisés oho jey Egíptope.