Otjihwa tjomakwiya tjaatji pi
EHUNGI 30
Otjihwa tjomakwiya tjaatji pi
MOSES we ya ondjira aihe nga kondundu Horeb okupaha ehozu kozonḓu ze. Imba eye wa muna otjihwa tjaatji pi, nungwari kaatji ningirire.
Moses we rihungirira a tja: ‘Ihi otjihimise. Ami me vanga okuryama kaṱiṱi popezu okukatara.’ Indu eye tja tjita nao eraka otji ra za motjihwa, ari tja: ‘O ryamene ko komeho, hukura ozongaku zoye, orondu poṋa pu wa kurama mbo opopayapuke.’ Mukuru ongwaa hungire okupitira momuengeli, mena ranao Moses wa kutjira omurungu we.
Okuzambo Mukuru wa tja: ‘Ami mba munu nawanawa ouzeu wotjiwaṋa tjandje moEngipte. Okutja ami me i okukevekutura, nove oove ngu me tumu okukapitisa otjiwaṋa tjandje moEngipte.’ Jehova wa ri ama kaeta ovandu ve kehi ewa raKanaan.
Nungwari Moses wa tja: ‘Ami omundu otja ami imbi me vi ungura vi? Nu ngatu tje ami mba i ngo, Ovaisrael tji ve ndji pura nave tja: “Owaṋi ngwe ku hindi?” Kunao ami hi tje vi?’
Mukuru wa zira a tja: ‘Imbi ombi mo ka hungira. “JEHOVA Mukuru waAbraham, na Mukuru waIsak na Mukuru waJakob we ndji hindi ku eṋe.”’ Nu Jehova wa weza na tja: ‘Indi ena randje nai nga aruhe.’
Moses wa pura a tja: ‘Nu owo tji ve hi nakukambura mu ami tji mbe ke ve raera kutja ove we ndji hindi?’
Mukuru we mu pura a tja: ‘Ihi tji u na tjo meke roye, otjikeṋa?’
Moses wa zira: ‘Okati.’
Mukuru arire tja tja ku Moses: ‘Ke yumba pehi,’. Nu Moses tja tjita nao, okati ake tjituka onyoka. Okuzambo Jehova wa raisira Moses otjihimise tjarwe: ‘Hitisa eke roye mombanda.’ Moses wa tjita nao, nu tja pitisa eke re, oro ra ri evapa twee tjimuna omakende wombepera. Eke aari munika tjimuna ra ri nomutjise omuvi mbu isanewa kutja omutjise wongana. Kombunda yanao Jehova wa yandjere omasa ku Moses okutjita otjihimise otjitjatatu. Korusenina eye wa tjere: ‘Ove tji wa katjita ovihimise imbi Ovaisrael mave kambura kutja ami mbe ku hindi.’
Kombunda yano Moses wa yaruka konganda na katja ku Jitro: ‘Arikana, ndji esa mbi yaruke kovazamumwe vandje mbe ri moEngipte, mbi ke ve tare kutja ingee ve nomuinyo.’ Kunao Jitro wa virikiza Moses nu Moses wa uta ouyenda we okuyaruka koEngipte.
