MAWSHE gaw shi a sagu ni sha na matu atsing hpe hkan tam let, Horeb bum de du ai. Dai kaw e, sumwum langai mi, wan grung nga ai hpe, mu ai. Raitimung dai sumwum gaw wan n hkru ai.

‘Ndai gaw lak lai nga ai;’ nga nna Mawshe myit ai. ‘Atsawm sha mu lu na matu, shani nna sit sa wa ai.’ Dai shaloi sumwum kaw na nsen pru wa nna, tsun ai gaw: ‘shawng de hkum sit wa nu; na a kyep din hpe raw kau u; nang kabye nga ai aga gaw, chyoi pra ai shara re;’ nga nna shaga dat ai. Karai Kasang gaw lamu kasa hku nna, aga shaga ai. Dai majaw Mawshe gaw, shi a myi man hpe, magap dat ai.

Dai hpang e Karai Kasang tsun ai gaw: ‘Egutu mung e nye a amyu masha ni hkrum ai, tsim yam hpe ngai mu ni ai. Dai majaw shanhte hpe , shalawt dat hkra ngai galaw na nngai; Nye a amyu masha ni hpe Egutu mung kaw na, shapraw wa na matu, nang hpe ngai shangun na nngai;’ nga ai. Yehowa gaw shi a amyu masha ni hpe, tsawm la ai Hkanan mung de, shaga sa wa na matu lajang nga ai.

Raitimung Mawshe ga tsun ai: ‘Ngai hpa nhkaw nngai. Ngai, gara hku nna, dai hpe galaw lu na kun? Israela masha ni hpang de sa wa yang, “Nang hpe gadai wa shangun dat ani?” nga nna, san na ma ai, ngai kaning ngu nna bai htan na rai ta?’ nga nna san ai.

Karai Kasang gaw, ‘Nang ning ngu nna htan lu na rin dai, “Abraham a Karai Kasang Isek a Karai Kasang Yaku a Karai Kasang ngu ai YEHOWA gaw ngai hpe nanhte hpang de, shangun dat ai”’ nga nna tsun shangun ai. Bai nna: ‘n dai shingteng amying gaw, prat mi hte prat mi na nye a amying rai nga ai;’ nga nna Yehowa kahtap tsun ai.

‘Ngai hpe shangun dat ai lam la ma wa shanhte n kam yang, gaw ngu nna kahtap san ai.’

‘Na a lata hta hpa lang ata?’ nga nna Karai Kasang gaw san ai.

‘Daw hkrawng re’ nga nna, Mawshe htan ai.

‘Karai Kasang gaw dai hpe ga de kabai dat u;’ nga ai. Mawshe gaw ga de kabai dat ai hte, Dawhkrawng gaw, lapu tai mat wa ai. Bai nna Yehowa gaw Mawshe hpe mauhpa amu bai madun ai. ‘Na a palawng galu kata de, lata hpe shawn bang u;’ nga ai. Tsun ai hte maren Mawshe galaw ai. Shi a lata hpe bai shaw la dat ai hte hkyen zawn hpraw mat ai. Lata kaw mang gang ana zawn byin mat wa ai. Dai hpang masum ngu na mauhpa kumla galaw dan lu ai, atsam Yehowa gaw Mawshe hpe jaw dat ai. Hpang jahtum e: ‘Nang ndai mauhpa lam, Israela masha ni a man e, galaw dan yang, ngai shangun dat ai nga nna, shanhte kam na ma ai;’ nga nna, tsun ai.

Dai hpang e Mawshe gaw, nta de nhtang wa nna, Yehtru hpe tsun ai: ‘nye a amyu masha ni gara hku nga ma ai kun? Chye lu hkra Egutu mung de sa na matu, ngai hpe ahkang jaw rit;’ nga ai. Dai hpang e, Yehtru gaw Mawshe hpe shakram dat ai. Mawshe mung Egutu mung de rawt sa wa nu ai.