O PEMBII Holɛb ve ikɛi pɔɔli Muuse ndoo kuɛ billo nuuviaa ni le saa nduaa. Loŋ o komal yiŋndeŋ o bɔɔ niŋ ni, kɛ bɔɔ ve ŋɔ le!

Mi Muuse lo loŋ mbo dimi aa, ‘Hei cho suɛi kɔndɔfili fɔ. I chɔɔlu wɔɔ sɔɔŋguu ikɛi mi nua lapi.’ Mɛɛ o hiŋ le sɔɔŋgoo ikɛi, mbo tuɛi diomndo o bɔɔ kalaa niŋ aa: ‘Sɔɔŋguu ikɛi le. Soli kɔvɛila numndaŋ, kanifuule o lɛŋnde diandaa leŋ choo ŋ sim ni.’ Maalikɛinɔ Mɛlɛka vemndo wa suɛi o ndulo ni. Mɛɛ mi Muuse tundu hɔlaa nduaa lɛŋ.

Okoŋ kɔɔli mi Mɛlɛka dimi aa: ‘I che kpendekele mɛɛ wanaa niaa cho mɔnɛi biyɔɔ Ichipi yɛ. Le hei, I cho nda lakɔ baŋa. Kɛ num ya cho viomɔɔ ni le ma kɔ soli nda Ichipi.’ O lɛŋnde kɛndɛleŋ Kenaŋ Jɛhowa ndoo yeema le hunɔɔ a nda ni.

Kɛ mi Muuse dimi aa: ‘Wana fondoo fuu ya cho ni. Vɛɛ ya cho yɛ hei looku tosa? O yɔŋ bɛɛ mi kuɛ, Isɔluɛitiiya cho ya lakɔ nyuna aa, “Nɛɛ vem yɛ num?” Okoŋ mi yɛɛ ya dimi yɛ?’

Mi Mɛlɛka mulul ndu aa: ‘Te a kuɛ pɛ, dimi naa: “JƐHOWA, Mɛlɛka Ebilahamndo, Mɛlɛka Aisakioo, a Mɛlɛka Chekɔpoo vem ya ni.” ’ Mi Jɛhowa dimi vɛlɛ aa: ‘Diola nilaŋ lacho laŋ ni lefafɛɛŋ.’

Mi Muuse dimi aa: ‘Kɛ te a laalaŋ yɛ maa num te vem ya le?’

Mi Mɛlɛka nyuna ndu aa: ‘Yɛɛ cho yɛ num koŋ o ba?’

Mi Muuse muli aa: ‘Tindaa.’

Mi Mɛlɛka dimi aa: ‘Mallɔ ndu lɛŋ.’ Mɛɛ Muuse mal ndu lɛŋ, mbo simnuŋ kɛuwo. Mi Jɛhowa chɔm vɛlɛ Muuse kaamaa cheleŋ. Mbo dimi aa: ‘Wou ba numndo o wɔɔndo bɛŋgu.’ Mi Muuse wou. Mɛɛ o soli baa, o wa o humbu maa feŋgbɛ. Mi baa yɔŋnuŋ ndu naŋ chaa lɛlɔŋ ni. Okoŋ kɔɔli mi Jɛhowa ke Muuse kpaayaa le kaamaa yaandɔɔ tosaa. Mbo mɛɛlu ndu dimul aa: ‘O yɔŋ pɛ ma tosa kaamaalaŋ ndaŋ, Isɔluɛitiiya cho laalaŋ maa ya vem num ni.’

Mɛɛ mi Muuse miiŋgu chiee mbo dimul Chɛtolo aa: ‘I yeema mi miiŋgu o wanayaŋ nuŋndo Ichipi le mi kɔ chɔ te a cho pɛ kɛndɛ. Lelaŋ yandii fallo, chɛlla I kua.’ Mɛɛ mi Chɛtolo choŋguŋ ndu aa idiiyoo. Okoŋ, mi Muuse biyaŋ kɔlaŋ Ichipi.