Chiputa Chakakahya
Chihande 30
Chiputa Chakakahya
MOSE atambukile tunda nakuya kupili yaHoleve akawane mwila wakulisa mikoko. Akamwene jino chiputa chakakahya, oloze kachapwile nakuwemako!
Mose ngwenyi: ‘Echi chuma chakukomwesa. Nanguyako nakuchitala kanawa.’ Hakuswenyako, muchiputa mwafumine lizu, ngwalyo: ‘Kanda upandama kwakamwihiko. Zula mendelo ove, mwomwo oho unemana hajila.’ Kalunga ikiye ahanjikilile muli kangelo, kaha Mose alifwikile kumeso enyi.
Jino Kalunga ambile ngwenyi: ‘Ngunamono kuyanda chavatu jami kuEjipitu. Shikaho nanguvapululula, kaha ove yove nangutuma mangana ukalovole vatu jami muEjipitu.’ Yehova ajinyine kutwala vatu jenyi kulifuchi lyakukupuka lyaKanane.
Oloze Mose ngwenyi: ‘Ami ngumutu wamokomoko. Nanguhasa ngachilihi kulinga ngocho? Numba nawa nge nanguya kuze. VaIsalele navakangwihula ngwavo, “Iya nakutumu?” Nangukamba ngwami ika?’
Kalunga ngwenyi: ‘Ukambulule ngwove: “YEHOVA Kalunga kaApalahama, Kalunga kaIsaka, Kalunga kaYakova nangutumu kuli enu.”’ Kaha Yehova ambile cheka ngwenyi: ‘Eli likiko lijina lyami haya myaka yosena.’
Mose ahulishile ngwenyi: ‘Nyi nge navakakana kungwivwilila omu nangukavalweza ngwami yove unangutumu.’
Kalunga ngwenyi: ‘Owo uli mulivoko lyove uka?’
Mose ngwenyi: ‘Mukombo.’
Kalunga ngwenyi: ‘Umbile hamavu.’ Mose hakuumbila, mukombo walumukile linoka. Yehova himwalweza Mose chisava chikwavo. Amwambile ngwenyi: ‘Ingisa livoko mukachi kauvwalo wove.’ Mose engishile, omu alilowele, livoko lyatomene to nge mbundu! Livoko lyasolokele nge lyapwile namusongo waupi wambumba. Kaha Yehova amuhanyine Mose ngolo jakulinga chisava chamuchitatu. Hakukuminyina amulwezele ngwenyi: ‘Omu mukalinga visava vino vaIsalele navaketavila ngwavo yami ngunakutumu.’
Kufumaho, Mose ayile kwimbo nakulweza Yetelo ngwenyi: ‘Achitave nguyenga ngukinduluke kuli vausoko wami kuEjipitu ngukavatale muvali nakuyoya.’ Ngocho Yetelo ambile kuli Mose ngwenyi, yakonga, kaha Mose akindulukile kuEjipitu.