MOSIA chu a beram tana hnim hmu turin Horeb tlang thlengin a lo kal a. Chutah chuan hnimbuk alh a hmu a, mahse a kang si lo va!

‘Hei hi a va mak e. Ka hnaih ang a ka en chiang teh ang,’ Mosia chuan a ti rilru a. A han hnaih chuan, hnimbuk atang chuan aw a lo chhuak a: ‘Rawn hnaih tawh suh. Lei thianghlima ding i nih vangin i pheikhawk phelh rawh,’ tiin. V antirhkoh hmangin Pathian a tawng a ni. Chuvang chuan Mosian a hmai a khuh a.

Pathian chuan: ‘Aigupta-a ka mite na tuar ka hmu tawh a. Chuvangin anmahni ka chhuahtir dawn a, Aigupta ata ka mite hruai chhuak tura ka tirh tur chu nangmah i ni,’ a ti ta a. Jehovan a mite chu Kanaan ram mawi takah a hruai dawn a ni.

Mahse Mosia chuan: ‘Engmah ka ni lo. Engtinnge chu chu ka tih theih ang? Tin kal pawh ni ila. Israel-mite chuan ka hnenah: ‘Tunge tir che?’ an ti ang a. Enge ka sawi ang?’ a ti a.

Pathianin a chhang a: ‘Hei hi i sawi tur chu a ni, “Abrahama Pathian, Isaka Pathian leh Jakoba Pathian Jehova chuan in hnenah mi tir,“ ti ang che,’ a ti a. Tin Jehova chuan ‘Hei hi chatuana ka hming a ni,’ tiin a sawi belh a.

‘Nangmahin mi tir tih ka sawi hunah mi ring ta lo sela,’ tiin Mosian a chhang a.

Pathianin: ‘I kutah enge awm?’ tiin a zawt a.

Mosian: ‘Tiang,’ tiin a chhang a.

‘Leiah paih rawh,’ Pathianin a ti a. Mosian a han paih chuan tiang chu rul a ni ta a. Jehovan thilmak dang Mosia a hmuhtir a. ‘I kawr chhungah i kut zen rawh,’ a ti a. Mosian a zen a, a han phawrh leh chuan vur angin a var a! Kut chu pharna an tih natna tha lo tak a kai ang mai a ni a. A hnuah chuan Jehovan Mosia chu thilmak pathumna tih theihna a pe leh a. A tawpah chuan ‘Heng thilmakte hi i tih hunah ka tir che tih Israel-miten an awih ang,’ a ti a.

Chumi hnuah chuan Mosia a haw a, Jethroa hnenah: ‘Engtinnge an awm tih en turin Aigupta-a ka laichinte hnenah mi kaltir rawh,’ a ti a. Tin Jethroa chuan Mosia hnenah dam takin a ti a, Mosia chuan Aigupta lam chu a pan ta a.