MOISÉS ya saʼnda kichó jña séjna nindo Horeb nga tíbasjaile jñá je barréle. Jngo yánaʼyá tsabe xi tíbʼajnga, ¡tonga je yánaʼyá likui títi!

“¡Ánni kʼoakjimasíni!” kitso Moisés. “Tosala tifikotsenle”. Nga je kichochrian, jña tíjna je yánaʼyá jngo jta̱ xi kitsole: “Li nʼiojin i̱ nichriain. Chʼasjai jténʼóli, nga ʼnde tsje jñani tijnai”. Ninání xi tsakjákao kʼoa jngo ánkje kisichjén, kuinga tsakʼéʼmasíni nkjaín Moisés.

Niná kitsole: “Tiʼbeña nga kjoañʼai tífaʼá naxinandána ya Egipto. Sikatíondaiña, kʼoa ji sikasénle nga chʼasjai ya ʼnde je”. Jeobá koanmele nga ya koaikao naxinandále ya Canaán nga naskánachon.

Tonga Moisés kitso: “Ali ʼyajian an. Jósʼin kuitjosonnina jebi. Kʼoa tsa kjuínrʼoe «ʼYáni xi kasíkasénli» kuitsojinna. Kʼoa jóxínle”.

“Kui jebi xi kʼuinlai”, kitsole Niná. “«JEOBÁ je Ninále Abraham, Ninále Isaac kʼoa Ninále Jacob, jé kasíkasénna»”. Xijekoan, kitsosa Jeobá: “Kui jebi jaʼainna ngantsjai nichxin”.

“Tonga, tsa tsín koa̱nkjainle nga kʼoaxínle nga ji tinikasénnai” kitso Moisés.

“Jméni xi kichʼatontsjasí” kitsole Niná.

Moisés kitso: “Jngo yá”.

“Tikʼatjenjinʼndai”, kitsole Niná. Kʼianga je kisikʼatjenjinʼnde Moisés, ye̱ tsakʼóya je yá xi yʼa. Xijekoan, ijngosa choa̱ tsakakóle Jeobá je Moisés. Kitsole: “Chanisʼain ndsai ya najñoli”. Kʼoakisʼin Moisés, kʼoa nga tsʼasje je ntsja, ¡ñaki chxoa sʼin koantsen joni tsa nyʼán! Joxi kjiʼndojon ntsja sʼin koantsen. Xijekoan, Jeobá kitsjoale nganʼio je Moisés nga koan kʼoakisʼin xi koanjanni choa̱. Xi jetʼani, Niná kitsole: “Kao kui choa̱ xokjoan koa̱nkjainnile je chjota israelita nga an tisikasénle”.

Xijekoan, Moisés kini ndʼiale kʼoa kitsole Jetró: “Tʼiain kjoanda, tʼaiʼndenai nga kjuia ya Egipto nga kjuíkotsenle jósʼin tjíoni xíngia”. Kitsjoaʼndele Jetró kʼoa Moisés ki ijngokʼani ya Egipto.