Sturka 30

Kyaya Dusa Ami Kan Ba

MOSES ba syîp nani dukyara twi pliki, Horeb ilka ba kat balan kan. Bara naha ra witin kyaya dusa kum ami kan kaikan, sakuna dusa ba sip ami luras kan!

Bara witin ‘dukya na aihka’ baku ai kupia ra luki, ‘kau pain kaikaia’ wisi lamara wan taim, kyayka dusa ba wina bila baikra kum taki win: ‘Kau lamara balpara. Klipaskam ba minam wina daiks, kan tasba huli ra sma.’ Baha ba Gâd insal kum bak aisi kan, baha mita Moses ai mawan ba prakan.

Bara Gâd mita witin ra win: ‘Yang upliki Idsipt ra pât wauhwi nani ba param pali kaikri. Yang witin nani ra pri sakaisna, baha mita man ra mai blikaisna baha wina sakma dukyara.’ Jehova ba ai uplika nani ra Kenan tasbaia painkira ra bribalaia luki kan.

Bara Moses win: ‘Yang na ya sna. Bara nahki baha ba daukamna ki? Sakuna bankra yang wamna sa kaka, Israel uplika nani ba, “Ya mita mai blikan?” ai makabi walbia sa kaka. Yang dia wimna ki?’

Bara Gâd pana win: ‘Man naku wima: ‘Ebraham, Aisak bara Jekob Gâdka JEHOVA ba mita, man nani ra ai blikan.’ ’ Bara baha purkara sin Jehova bila naku wibia win: ‘Naha sika ban kaiara yang nini kaia ba.’

Bara Moses bila Gâd ra pana win: ‘Man mita ai blikram wirika kasak luki bangwras sa kaka?’

Nanara Gâd mita makabi walan: ‘Mihtam ra dia brisma ki?’

Moses bila: ‘Dus kum brisna.’

Bara Gâd bila: ‘Tasba ba ra swis.’ Bara witin baku daukan taim, dusa ba pyuta kum takan. Baha wina, Jehova mita Moses ra sain wala kum dauki marikan. Witin bila: ‘Nanara mihtam ba lamam bilara dingks.’ Witin baku dauki kli ai mihta ba sakan taim, mihta ba wahmuk pinhka baku takan kan! Lepar sikniska bri baku kaiki kan. Baha ningkara Jehova mita Moses ra karnika yaban sain yuhmpika daukbia dukyara. Bara tnata kat witin bila: ‘Naha sainka nani daukma bara, Israel uplika nani yang mai blikri ba dukyara kasak luki bangwbia.’

Baha ningkara Moses ba kli ai watla ra taui wih Jetro ra naku win: ‘Dupali ai swis kli Idsipt ra wih taiya nani ba nahki sa sapa kaikaia.’ Baku bamna Jetro mita Moses ra aisabi win, bara witin mahka Idsipt kuntrika ra kli impakan.

Impakan sturka 3:1-22; 4:1-20.