Uitskuoujtaktsoj xotatoya
Tanojnots 30
Uitskuoujtaktsoj xotatoya
MOISÉS ajsik itech tepet Horeb kintemolijtiaya xiuit ichkamej. Ompa kiitak se uitskuoujtaktsoj xotatoya, ¡sayoj ika uitskuoujtaktsoj amo chichinauiya!
Moisés moluij: ‘¡Amo keman ijkon nikitstoya!’ Okachi kuali nikitati. Keman motokito, itech uitskuoujtaktsoj kikakik se tajtolis: ‘Amo ximotokiok. Ximotekakkixti, porin kampa tiyetok talchipaujkan’. Katka Dios tein tajtouaya itenkopa se ángel, uan yejika Moisés moixtsakuak.
Ompa Dios kijtoj: ‘Nikitstok keniuj tajyouijtokej israelitas itech altepet Egipto. Nikinimakixtiti, uan tejua nimitstitani xikinkixtiti’. Jiova yaya kiniuikati israelitas itech kualtsin ueyi altepet Canaán.
Sayoj ika, Moisés kijtoj: ‘Nej amo teyi nichiujkej. ¿Keniuj uelis nikchiuas nejin? Uan komo niouj nechiluiskej: “¿Akoni mitsualtitanik?” ¿Toni nikiniluis?’
Dios tanankilij: ‘Yejua nejin tikiniluis, “JIOVA, iDios Abraham, iDios Isaac uan iDios Jacob nechualtitanik”’. Ompa, Jiova kijtoj okseki tajtolmej: ‘Nochipaya nejin eski notokay’.
Moisés tanankilij: ‘Sayoj ika, ¿uan komo amo nechneltokiliaj keman nikiniluis ika tejua tinechtitanik?’
Dios kitajtanij: ‘¿Toni timaktok?’
Moisés kinankilij: ‘Se kuouit’.
Dios kiiluij: ‘Xiktamota talpan’. Keman Moisés kichiuak nejon, kuouit mokepak se kouat. Satepan, Jiova kinextilij Moisés okse mouiskatekit, uan kiiluij: ‘Ximomaeua itech motaken’. Moisés kichiuak uan keman momakixtij, ¡katka maistak kemej sekti! Pane kipiaya kokolispalanilis. Ompa, Jiova kimakak uelilis Moisés uan maj ika kichiuani expatika mouiskatekit. Ika tamik kiiluij: ‘Ika nejin mouiskatekimej israelitas mitsneltokiliskej ika nejua nimitstitanik’.
Satepan, Moisés mokepak ichan uan kiiluij Jetró: ‘Nimitstataujtia, xinechkaua maj nimokepa Egipto maj nikinitati nochankauan’. Jetró kiiluij Moisés maj kualtsin youi, uan yej moojketsteuj uan mokepak Egipto.
