RÄ Moises xki ma asta ha rä tꞌo̱ho̱ Oreb pa dä hyombäbi te dä zi yä de̱ti. Ja gekua bi hyandi nꞌa rä ꞌmai ꞌmini mi zo̱o̱, ¡pe näꞌä rä ꞌmai ꞌmini himi tsätꞌi!

“¿Te rä me̱hni?”, bi ꞌñenä rä Moises. “Ma gä handi xä ñho.” Mi uatꞌi ha näꞌä rä ꞌmai ꞌmini, bi yꞌo̱de nꞌa toꞌo bi ꞌñenä: “Ogi kuatꞌi. Kꞌoꞌti ri ze̱xthi, ngeꞌä nunä rä hai habu̱ gi netꞌi xä ꞌueke Äjuä”. Mi geꞌä Äjuä xki me̱hni nꞌa rä e̱nxe̱ pa dä ñäui rä Moises, hänge rä Moises bi goti yä da.

ꞌNepu̱ Äjuä bi ꞌñenä: “Di handi hanja bi sufri mä hnini ha Ejipto. Ma gä ju̱ki, hänge go di ꞌme̱pꞌäꞌi guä ju̱ki de gehni”. Jeoba ma xä zitsꞌi yä israelita pa ha nꞌa rä hai xa mähotho tꞌembi Kanään.

Pe rä Moises bi ꞌñenä: “Hinte rä me̱kägi. ¿Hanja mä gä ja? Mu̱ gä ma, yä israelita ma dä ꞌñenä: «¿Toꞌo bä pe̱hnäꞌi?» ¿Te ma gä thädi?”.

Äjuä bi ꞌñembi: “Gehnä ma gi xipi: «JEOBA, näꞌä rä Zi Dada rä Abraan, rä Zi Dada rä Isak ꞌne rä Zi Dada rä Jakob go geꞌä bä pe̱nkägi gä ehe kongeꞌähu̱»”. Jeoba bi ꞌñenä ꞌnehe: “Gehnä mä thuhu pa nzäntho”.

Rä Moises bi dädi: “Pe, ¿xiꞌmu̱ nuꞌu̱ hindä gamfrigi nuꞌmu̱ gä xipäbi ge nuꞌi go gä pe̱nkägi?”.

Äjuä bi yꞌambäbi: “¿Te gi hñä ha ri yꞌe̱?”.

Rä Moises bi dädi: “Nꞌa rä zaa”.

Äjuä bi ꞌñembi: “Yꞌe̱i ha rä hai”. Rä Moises bi jabu̱, ꞌne näꞌä rä zaa bi mpu̱ngä kꞌeñä. Nubye̱, Jeoba bi ꞌñuti mänꞌa rä milagro. Bi ꞌñembi: “Yꞌe̱ntꞌi ri yꞌe̱ ha ri hee”. Rä Moises bi yꞌo̱de, ꞌne mi hñäi rä yꞌe̱, ¡xi mi tꞌaxi ngu rä xitse̱! ꞌÑenä mi tsu̱di näꞌä rä tsꞌo ñheni tꞌembi rä lepra. ꞌNepu̱, Jeoba bi umbi rä tsꞌe̱di rä Moises pa bi ja näꞌä rä hñuu rä milagro. Pa ri uadi, bi ꞌñembi rä Moises: “Nuyu̱ yä milagro ma dä japi yä israelita dä gamfri ge go dä pe̱hnäꞌi”.

Mꞌe̱fa, rä Moises bi mengi ha rä nguu ꞌne bi ꞌñembi rä Jetro: “Jakä rä mäte, rꞌaki nse̱ki gä pengi ha Ejipto pa gä nuu te bi pe̱fi mä pariente”. Hänge rä Jetro bi netsꞌi rä Moises, ꞌne nuni bi gu̱ rä ꞌñuu pa Ejipto.