MOZESE afunikira kuenda mpaka ku phiri ya Horebi towera kagumanira thongwe mabirace. Kweneku aona thunduzi mbikagaka, mbwenye nee ikhapya tayu!

Mozese anyerezera: ‘Ceneci ndi cacilendo. Ndinafendedzera paduzi kakamwe towera ndione mwadidi.’ Mudafendedzera iye, pathunduzi pabuluka fala, mbilonga: ‘Leka fendedzera paduzi. Bulusa masandali ako, thangwi walimira pa mbuto yakucena.’ Akhali Mulungu akhalonga kubulukira kwa anju, natenepa Mozese aphimba nkhope yace.

Natenepa Mulungu alonga: ‘Ndisaona kunenseka kwa anthu anga ku Ijitu. Natenepa ine ndinadzaasudzula, pina ndikutumiza iwe katsogolera anthu anga kubuluka ku Ijitu.’ Yahova mbadadzakwata anthu ace kuaendesa ku dziko yakubalika ya Kanani.

Mbwenye Mozese alonga: ‘Ndine ani ine. Kodi ndinapicita tani? Nyerezerani kuti ine ndaendadi. Aisrayeli anadzalonga kwa ine, “Kodi mbani adakutuma?” Kodi ndinadzalonganji mphapo?’

Mulungu atawira: ‘Ipi ndipinafuna longa iwe. “YAHOVA, Mulungu wa Abrahamu, Mulungu wa Isaki na Mulungu wa Yakobo andituma kwa imwe.”’ Yahova athimizira: ‘Iyi ndi dzina yanga kwenda na kwenda.’

Mozese atawira: ‘Nyerezerani kuti iwo nkhabe khulupira ndikalonga kuti imwe mwandituma.’

Mulungu abvunza: ‘Kodi ndi ninji ciri m’dzanja yako?’

Mozese atawira: ‘Ndi ndodo.’

Mulungu alonga: ‘Iponye pantsi.’ Mudaiponya iye, yasanduka nyoka. Buluka penepo Yahova aonesa Mozese cirengo cinango. Iye alonga: ‘Ikha dzanja yako m’nguwo mwako.’ Mozese apicita, mudabulusa iye dzanjace, ikhali yakucena ninga neve! Dzanja yaoneka ninga ikhali na utenda wakuipa unacemerwa thanya. Patsogolo pace Yahova apasa Mozese mphambvu yakucita cirengo cacitatu. Pakumalisira iye alonga: ‘Ukacita pirengo ipi Aisrayeli anadzakhulupira kuti ine ndakutuma.’

Buluka penepo Mozese abwerera kunyumba mbapanga Yetero: ‘Ndaphata mwendo, ndisiyeni ndibwerere kwa acibale anga ku Ijitu towera ndikaaone kuti ali tani.’ Yetero apangana Mozese, na Mozese atoma ulendo ace wakubwerera ku Ijitu.