MOÏSE ague juska na kota hoto ti Horeb ti gi pere ndali ti angasangbaga ti lo. Kâ, lo bâ wâ na yâ ti mbeni kete keke, me wâ ni ate ni pëpe.

Moïse atene na bê ti lo, lo tene: ‘So ayeke ye ti kpene! Zia mbi gue nduru ti bâ ni nzoni.’ Tongana lo ye ti ga nduru na kete keke ni, mbeni go atoto na yâ ti keke ni, atene: ‘Ga nduru ge pëpe. Zi poro na gere ti mo, ngbanga ti so mo luti na mbeni ndo so ayeke nzoni-kue.’ A yeke Nzapa si asara tënë na lo na lege ti mbeni ange. Tongaso, Moïse ahonde lê ti lo

Nzapa atene: ‘Mbi bâ pono ti azo ti mbi na Égypte. Ni la, mbi yeke zi ala na mbi yeke tokua mo ti sigigi na ala na Égypte.’ Ngoi aga nduru awe ti tene Jéhovah aga na azo ti lo na pendere sese ti Canaan.

Me Moïse atene: ‘Mbi yeke ye oko pëpe. Mbi lingbi ti sara ye so tongana nyen? Ka tongana mbi gue si azo ti Israël ahunda mbi, atene: “Zo wa la atokua mo?” Mbi yeke tënë nyen?’

Nzapa atene na lo atene: ‘Mo yeke tene na ala tënë so: “JÉHOVAH, Nzapa ti Abraham, Nzapa ti Isaac na Nzapa ti Jacob atokua mbi na ala.” ’ Jéhovah akiri atene: ‘So ayeke iri ti mbi teti lakue lakue.’

Moïse atene: ‘Me ka tongana ala yeda pëpe so mo la mo tokua mbi.’

Nzapa ahunda lo, lo tene: ‘Nyen la ayeke na maboko ti mo?’

Moïse atene: ‘Keke.’

Nzapa atene: ‘Bi keke ni na sese.’ Tongana Moïse abi keke ti lo na sese, keke ni aga ngbo. Jéhovah afa na lo mbeni miracle nde. Lo tene: ‘Yôro maboko ti mo na yâ ti bongo ti mo.’ Moïse asara tongaso, na tongana lo lungula maboko ti lo, a vuru ngangu. Maboko ti lo akpa mo bâ mo tene kobela ti buruma si asara ni. Na pekoni, Jéhovah amû ngangu na Moïse ti sara ota miracle ni. Na nda ni, Nzapa atene: ‘Tongana mo sara amiracle so, azo ti Israël ayeke yeda so mbi si mbi tokua mo.’

Na pekoni, Moïse akiri na kodoro ti Jéthro na lo tene na lo: ‘Zia mbi kiri na Égypte ti bâ azo ti mbi.’ Jéthro azia Moïse ti gue.