MUSE gereewisira hayisso hasiˈranni Korebi ilaali geeshsha haˈri. Hakkiichchono buwanno cita lai, ikkollana citu digiiramino!

Muse, ‘Kuni hiikkinoreeti’ yee hedi. ‘Shiqqi yee seekke laeemmo’ yii. Shiqqi yii wote, citu giddonni fultino huuro togo yitusi: ‘Kowiira shiqqi yitooti. Kaxxootto uulla qullaawa ikkitinohura caammakki fushshi.’ Musera sokkaanchu widoonni coyiˈranni noohu Maganoho. Konni daafira Muse albasi gugguˈli.

Maganu togo yiisi: ‘Gibitsete heeˈranno manniˈya qarra laoommo. Borojjimmatenni fushshammonsaraati, Konni daafira ate hakka soyeennahe Gibitsete gobbanni mannaˈya massagge fushshato.’ Yihowa mannasi Kanaˈˈaanni yinannita dancha gobba massansaraati.

Muse kayinni, ‘Massage fushsheemmohu ani ayeeti? Ani gariha diˈˈikkoommo. Haˈre fulle yuummoro nafa, Isiraaeelete gosa, “Ayi soyinohe?” yitannoe. Hakkawote mayyeemmo?’ yii.

Maganu qole, ‘Togo yaattonsa’ yiisi. ‘“Abirahaami Magani, Yisaaqi Magani, Yaaqoobi Magani YIHOWA soyinoe” yiinsa.’ Ledeno Yihowa, ‘Hegererano suˈmiˈya konneeti’ yiisi.

Museno, ‘Ati soottoeta kuleennansa ammana gibburonaa?’ yii.

Maganu Muse, ‘Angakkira noohu maati?’ yiisi.

Museno, ‘Siqqote’ yii.

Maganuno, ‘Uullara tugi’ yiisi. Muse siqqosi uullara tugita, siqqo hamashsho ikkitu. Yihowa xaano Musera wole maalale leellishisi. Togo yiisi: ‘Angakki kikkiˈlakki giddora eessi.’ Muse angasi kikkiˈlatenni fushshita kaadete gedee waajjo ikkitino! Anga xiigaho yinannihu bushu xibbi amadinohu gede ikkitu. Aanteteno Yihowa Musera wole sayikki maalale assanno gede wolqa uyisi. Gedensaannino, ‘Tenne baala maalale assatto wote, Isiraeelete gosa ani soommoheta ammantanno’ yiisi.

Hakkunni gedensaanni Muse minira haˈre Yootoori, ‘Gibitse haˈre fiixiˈya noo gara layireemmona fajjie’ yii. Yootoorino Muse keerunni yeenna, Muse Gibitse haˈri.