MOSI abehambe indlela lendze aya entsabeni iHorebe kute atfolele timvu takhe tjani. Wabona sihlahla sivutsa kodvwa singashi.

Wakhuluma yedvwa watsi: ‘Loku akukavami, asengiphambuke ngitewubona kancono.’ Watsi nakasondzela weva livi liphuma kulesihlahla litsi: ‘Ungasondzeli, khumula tincabule takho, ngoba lendzawo lome kuyo ingumhlabatsi longcwele.’ KwakunguNkulunkulu lona labekhuluma asebentisa ingilosi, ngako Mosi wambonya buso bakhe.

Nkulunkulu wachubeka watsi: ‘Sengikubonile kuhlushwa kwebantfu bami labaseGibhithe. Ngako ngiyobakhulula, futsi nguwe lengitakutfuma kutsi uyobakhipha lapho.’ Jehova abetawuyisa bantfu bakhe eveni lelihle laseKhenani.

Kodvwa Mosi watsi: ‘Ngingubani mine kutsi ngingakhulula ema-Israyeli eGibhithe? Nangabe ngiya, ema-Israyeli atawutsi, “Utfunywe ngubani?” Ngitawuphendvula ngitsini?’

Nkulunkulu waphendvula watsi: ‘Naku loyokusho, “[JEHOVA] Nkulunkulu wabo-Abrahama, na-Isaka, naJakobe ungitfume kini.”’ Wachubeka watsi: ‘Leli ligama lami kuze kube phakadze.’

‘Ngitawutsini nangitsi ngiyabatjela bangangikholwa kutsi ngitfuywe nguwe?’ Kubuta Mosi.

Nkulunkulu wambuta naye watsi: ‘Yini lena lesesandleni sakho?’

Watsi: ‘Yindvuku.’

Nkulunkulu watsi kuye: ‘Yijike phasi.’ Wayijika yagucuka yaba yinyoka. Jehova wakhombisa Mosi lesinye futsi simangaliso. Watsi: ‘Faka sandla sakho esifubeni sakho.’ Wenta njalo, watsi nakasikhipha saphuma simhlophe njengelichwa, sasingatsi sinesifo lesibi sebulephelo. Wabese umnika emandla ekwenta simangaliso sesitsatfu. Ekugcineni Jehova watsi: ‘Nawenta letimangaliso ema-Israyeli atawukholwa kutsi ngikutfumile.’

Ngemva kwaloko Mosi wabuyela kuJethro watsi kuye: ‘Ngicela umane ungivumele ngibuyele eGibhithe ngiyewuhlola kutsi bakhona yini bantfu bakitsi labasaphila.’ Jethro wamvumela, bavalelisana, Mosi wahamba wabuyela eGibhithe.