30-нҗы хекая

Янып дуран гырымсы агач

МУСА гоюнларына от гөзләп, Хореп дагына етди. Ол бир гырымсы агаҗы гөрди. Агач янып дурды, йөне нәме үчиндир янып гутаранокды.

Муса: «Гең зат. Голайына барып, говуҗа середейин» дийип ойланды. Хачан-да ол голайлашанда: «Голайлашма, көвшүңи чыкар. Чүнки дуран ериң мукаддес ер» дийип, гырымсы агачдан сес чыкды. Муны Худай өз перишдеси аркалы айтды. Шонуң үчинем Муса йүзүни япды.

Шонда Худай: «Мен Мүсүрде халкымың эҗир чекйәнини гөрдүм. Оны халас этмекчи. Сен болса мениң халкымы Мүсүрден алып чыкарсың» дийди. Ехова өз халкыны аҗайып Кенган юрдуна гетирмекчиди.

Йөне Муса: «Бейле затлары эдер ялы, мен ким? Боляр, айдалы, бардымам-да. Йөне ысрайыллылар менден: «Сени ким иберди?» дийип сорасалар, мен нәме җогап берерин?» дийди.

Худай: «Олара Ыбрайымың Худайы, Ысхагың Худайы ве Якубың Худайы ЕХОВА мени сизиң яныңыза иберди диерсиң» дийип җогап берди.  Соңра Ехова: «Эбедилик мениң адым шудур» дийди.

— Йөне олар мени сениң иберендигиңе ынанмасалар нәдерин? — дийип, Муса сорады.

Худай:

— Элиңдәки нәме? — дийди.

Муса:

— Хаса — дийип, җогап берди.

— Оны ере ташла — дийип, Худай буюрды. Муса хасасыны ере ташланда, хаса йылана өврүлди. Соңра Ехова Муса ене бир гудрат гөркезди. Ол: «Элиңи голтугыңа сал» дийди. Муса айдышы ялы-да этди. Элини голтугындан чыкаранда, гар ялы чув акды. Хамала элини эрбет хейвере кесели уран ялыды. Соңра Ехова Муса үчүнҗи гудраты гөркезер ялы гүйч берди. Булардан соң Худай Муса: «Шу гудратлары гөркезеңде, ысрайыллылар сени мениң иберендигиме ынанарлар» дийди.

Муса өйүне барып Етро: «Хайыш эдйән, гарындашларымың янына барып, оларың халындан хабар алмага маңа ругсат бер» дийди. Муса Етро билен хошлашып, ызына Мүсүре тарап уграды.

Чыкыш 3:1—22; 4:1—20.