JA Moisés jakel sleʼ yi swaʼel ja xcheji man bʼa wits Horeb. Ja tiw ti yila jun yal ibʼe kʼul wan ajlel, ¡pe ja yal ibʼe kʼuli mini stsika!

Moisés jel och spensar soka jas yila, ja yuj ti yala sbʼaja: «Oj waj kil jasunkiluk ja wan ekʼeli». Yajni mojxi ochi, ti yabʼ jun kʼumal ja bʼay ja yal ibʼe kʼuli, yala: «Mokxa jel mojxan jani. Sopoʼel ja wa xanabʼi, yujni ja bʼaya slujmal Dyos». Jani ja skʼumal ja Dyos wa xya ekʼ jun anjel, ja yujil ja Moisés smaka ja sati.

Anto ja Dyosi ti yalaʼa: «Kilone ja swokol ja kuntikil teye bʼa Egipto. Ojni jkoltayeʼa, ja yuj wa xjekawa bʼa weʼn oj wa eluke ja bʼa tiw». Ja Jyoba tini oj yiʼoch bʼa tsamal chonabʼ bʼa Canaán.

Anto ja Moisés ti sjakʼaʼa: «Ja keʼn mini jasukona. ¿Jastal oj bʼobʼ jkʼuluk ja it? Ja ta wajyoni oj sjobʼeki: “¿Maʼ sjekawajani?”. Anto, ¿jas oj kale yabʼi?».

«Jaʼa it ja jas oja wale», xchi ja Dyos. «JYOBA ja sDyos ja Abrahán, ja sDyos ja Isaac sok ja sDyos ja Jacob sjekonejon bʼa weʼnlex. Ja it jani ja jbʼiʼili bʼa tolabida.»

Anto ja Moisés yala: «¿Pe jaxa ta yeʼnle mi skʼuʼaneki ja yajni xkala weʼna jekawoni?».

Ja Dyosi ti sjobʼo yiʼa: «¿Jasa yamanawuji?».

«Jun najbʼanteʼ», xchi ja Moisés.

Ja Dyosi yala yabʼ: «Jipa bʼa luʼum». Yajni ja Moisés sjipa ja snajbʼanteʼ, ja it pax jun bʼitsʼbʼichan. Anto, ja Jyoba ti cha sjeʼa yi pilan senya ja Moisés, yala: «Chʼika wa kʼabʼi bʼa yojol ja wa pal kʼu». Jachʼ skʼulan ja Moisés, yajni ya eluk ja skʼabʼi ja bʼa yojol ja spal kʼuʼi, ¡sakalanixta jastal teʼew! Lajansok ja yeʼn ja yiʼoj ja chamel sbʼiʼil lepra. Anto ja Jyoba ti cha yala yabʼ pilan ekʼele a-schʼik ja skʼabʼi bʼa yojol ja spal kʼuʼi, yajni ya eluk ja skʼabʼi tojbʼelxa. Anto ja Jyoba yaʼ yi ja Moisés ipal bʼa oj skʼuluk jun yoxil senya. Ti yala yabʼa: «Ja senyaʼik it oj makunuk bʼa oj skʼuʼuke ja israʼelenyo keʼn jekuneja».

Tsaʼan, yajni ja Moisés kumxi ja bʼa snaji ti yala yabʼ ja sniʼali: «Aʼawa pabor jekawon bʼa oj kumxukon bʼa Egipto bʼa oj waj kil jastal wan ekʼel yujile ja jpamilya jumasaʼ». Ja yuj ja Jetró ti sjeka ja Moisés, sok ja yeʼn kʼe stul yi ja najat sbʼejyel man Egipto.