NAKAABOT hi Moises ha bukid han Horeb ha pagpinamiling hin mga banwa para ha iya mga karnero. Dinhi, nakakita hiya hin naglalaga nga kahoy-kahoy kondi diri ito nauugtang!

‘Urusahon ini,’ nahunahuna ni Moises. ‘Mahirani ako basi makita ko hin mas maopay.’ Han nagtitikahirani na hiya, hinbatian niya an tingog tikang ha kahoy-kahoy nga nasiring: ‘Ayaw na pagdaop ngadi. Hukasa an imo sandalyas tungod kay natukdaw ka ha baraan nga tuna.’ An Dios an nagyayakan hito pinaagi han anghel, salit gintabonan ni Moises an iya nawong.

Katapos, hi Jehova nga Dios nagsiring: ‘Akon hinkit-an an kakurian han akon katawohan ha Ehipto. Salit akon tatalwason hira, ngan ikaw an akon susugoon ha pagpagawas ha ira ha Ehipto.’ Dadad-on ni Jehova an iya katawohan ha makaruruyag nga tuna han Kanaan.

Kondi hi Moises nagsiring: ‘Diri ako takos. Paonan-o ko ini bubuhaton? Kon kumadto ako, mapakiana an mga Israelita, “Hin-o an nagpakanhi ha imo?” Ano an akon ibabaton?’

‘Ini an imo isisiring,’ binaton an Dios. ‘Hi JEHOVA, an Dios ni Abraham, an Dios ni Isaak ngan an Dios ni Jakob an nagpakanhi ha akon.’ Ngan hi Jehova nagsiring pa: ‘Ini an akon ngaran ha kadayonan.’

‘Kondi, ano an akon bubuhaton kon diri hira tumoo nga ikaw an nagpakanhi ha akon?’ binaton hi Moises.

‘Ano ito nga aada ha imo kamot?’ nagpakiana an Dios.

Hi Moises binaton: ‘Usa nga tungkod.’

‘Ilabog ito ha tuna,’ siring han Dios. Ngan han iginlabog ito ni Moises, nagin halas ito. Katapos, iginpakita ni Jehova kan Moises an usa pa nga milagro. Hiya nagsiring: ‘Ibutang an imo kamot ha sulod han imo bado.’ Ginbuhat ito ni Moises, ngan han igin-gawas niya an iya kamot, mabusag ito pariho han niebe! Sugad ito hin may-ada makangingirhat nga sakit nga sanla. Sunod, gintagan ni Jehova hi Moises hin gahum ha paghimo han ikatulo nga milagro. Ngan hiya nagsiring: ‘Kon buhaton mo ini nga mga milagro, matoo an mga Israelita nga ako an nagpakanhi ha imo.’

Katapos hito, inuli hi Moises ngan nagsiring kan Jetro: ‘Nanginginyupo ako ha imo, pabalika ako ha akon mga paryente ha Ehipto basi makita ko an ira kahimtang.’ Salit ginpalakat ni Jetro hi Moises, ngan binalik hi Moises ha Ehipto.