MUSAA mu ngiy sàmm xaram yi. Dem na ba ca montaañ bi tudd Oreb. Foofu mu gis benn garab boo xam ne dafay tàkk waaye du jeex !

Musaa ne : ‘ Lii de, doy na waar. Xaaral ma jegesi, seet ba xam. ’ Mu jegesi, daldi dégg benn baat bu jóge ca garab ga. Baat bi ne ko : ‘ Taxawal fi nga nekk. Summil say dàll, ndaxte fi nga nekk, suuf su sell la. ’ Yàlla moo doon jaar ci malaaka ngir wax ak Musaa. Musaa daldi muur kananam.

Yàlla ne ko : ‘ Gis naa samay nit di sonn lool Misra. Léegi dama bëgg ñu jóge ci loxo waa Misra, te yow laay yónni ngir génne leen foofu. ’ Yexowa dafa bëggoon a yóbbu nitam yi, maanaam waa Israyil, ca réew mu rafet mi tudd Kanaan.

Waaye Musaa ne ko : ‘ Man may kan ba di mën a def loolu ? Te su ma demee te waa Israyil laaj ma : “ Kan moo la yónni ? ” Lan laay wax ? ’

Yàlla ne ko : ‘ Lii nga leen di wax : “ YEXOWA, ki nekk Yàlla Ibraayma, Yàlla Isaaxa ak Yàlla Yanqóoba, moo ma yónni ci yéen. ” ’ Ba pare Yexowa wax lii : ‘ Loolu mooy sama tur ba fàww. ’

Musaa ne ko : ‘ Waaye su ñu gëmul ne yow yaa ma yónni, lan laay def ? ’

Yàlla laaj ko : ‘ Loo yor ci sa loxo ? ’

Musaa tontu ko ne : ‘ Yet. ’

Yàlla ne ko : ‘ Sànni ko ci suuf. ’ Mu sànni ko ci suuf, yet ba soppaleeku jaan. Yexowa def beneen kéemaan. Mu ne ko : ‘ Dugalal sa loxo ci sa mbubb. ’ Musaa def ko. Bi mu génnee loxoom, mu ngi weexoon tàll, mel ni dafa amoon feebar bu ñu wax ngaana ! Yexowa may Musaa kàttanu def beneen kéemaan, ba pare mu wax ko lii : ‘ Boo defee kéemaan yooyu yépp, waa Israyil dinañu gëm ne man maa la yónni ci ñoom. ’

Ginnaaw loolu Musaa dellu këram, ne Yétro : ‘ Nanga ma bàyyi ma dem seeti samay mbokk yi nekk Misra, ba xam ndax ñu ngi ci jàmm. ’ Yétro ne ko : ‘ Demal ak jàmm. ’ Musaa daldi tàmbali tukki boobu jëm Misra.