MUSA ayice akuno ku litumbi lya Holebe kuti apate mopo wa ngondolo syakwe. Ali ku Holebeku ŵaliweni liwukutu lili mkukolela moto, nambo nganilipyaga!

Musa ŵaganisisye kuti: ‘Yeleyi yili yakusimonjesya. Cimbandicile kuti ndolecesye cenene.’ Paŵaŵandicile, maloŵe gapikanice kutyocela mu liwukutu lila, kuti: ‘Mkasim’ŵandicila akuno. Wulani sapato syenu, ligongo mjimi pamalo gapajika.’ Mlungu ni juŵaŵecetaga kupitila mwa lilayika. M’yoyo Musa ŵawunucile ngope jakwe.

Kaneko Mlungu ŵaŵecete kuti: ‘Nakuweni kulaga kwa ŵandu ŵangu ŵali ku Eguputo. Sambano une ngusaka nagopole, soni mmwejo ngumtuma kuti mkakoposye ŵandu ŵangu ku Eguputo.’ Yehofa ŵasakaga kwajawusya ŵandu ŵakwe ku cilambo cakusalala ca Kanani.

Nambo Musa ŵatite: ‘Une ndili mundu jwangali mate. Ana mpaka ngombole kutenda yeleyi catuli? Soni atamose tuwanicisye kuti ndili njawileko. Ayisalayeli cakambusye kuti, “Nduni jwamtumile mmwejo?” Sambano une cingajanje kuti wuli?’

Mlungu ŵamjanjile kuti: ‘Ayi ni yacimkajanje.’ “‘YEHOFA Mlungu jwa Abulahamu, Mlungu jwa Isaki, soni Mlungu jwa Yakobo andumile une kwa jemanja.’” Mlungu ŵaŵecetesoni kuti: ‘Ali lili lina lyangu mpaka kalakala.’

Musa ŵajanjile kuti: ‘Nambo sambano tuwanicisye kuti ngakungulupililape ndili nasalile kuti wawojo andumile une.’

Mlungu ŵam’wusisye kuti: ‘Ana cici cacili m’miyala mwenumo?’

Musa ŵajanjile kuti: ‘Simbo.’

Mlungu ŵamsalile kuti: ‘Mjiponye pasi.’ Musa paŵaponyisye pasi simbo jila, jasyucile lijoka. Kaneko Yehofa ŵamlosisyesoni cakusimonjesya cine. Ŵamsalile kuti: ‘Mjinjisye ligasa lyenu mumkanjo wenuwo.’ Musa ŵajinjisye, nambo paŵakopwesye ligasa lila, lyaliji lyeswela mpela matalila! Ligasa lila lyawonekaga mpela kuti likwete ulwele wakusakala wa matana. Kaneko Yehofa ŵampele Musa macili gakutendela cakusimonjesya catatu. Kumbesi kwakwe ŵaŵecete kuti: ‘Pacimkatende yakusimonjesyayi, Ayisalayeli cakakulupilile kuti namtumile unejo.’

Kaneko Musa ŵapite kumangwakwe nikumsalila Yetelo kuti: ‘Conde angunde mbujile kwa acalongo acimjangu ku Eguputo kuti ngalole mwaŵelele.’ M’yoyo Yetelo ŵalangene ni Musa, ni Musa ŵawutandite ulendo wakwe wakuwujila ku Eguputo.