Ti yagahuiiniʼ naze bele
Historia 30
Ti yagahuiiniʼ naze bele
MOISÉS yendá dede lu dani láʼ Horeb, cuyúbibe guixi para ca xténdxube. Raríʼ biiyabe ti yagahuiiniʼ naze bele, ¡peru yagahuiiniʼ riʼ cadi cayaaquiʼ diʼ ni!
¡Nayaahui ndiʼ njaʼ! guníʼ ique Moisés. Jma galán chiguyachaahueʼ ni. Ora bidxíñabe la? de ra nuu yagahuiiniʼ que biree ti ridxi na: Cadi guidxíñaluʼ jma gaxha, gulee guelaguidi ca ñeeluʼ purtiʼ nuaa raríʼ. Dios ngue biquiiñeʼ ti ángel stiʼ para guníʼ, ngue runi Moisés bichii lú.
Óraque Dios gudxi laabe: Maʼ biiyaʼ xquidxeʼ nabé cayacaná Egipto, chigulaya laacabe ne cuseendaʼ lii para cueeluʼ laacabe de raqué. Jiobá chiné laacabe Canaán ti guidxi guizáʼ sicarú.
Peru Moisés na: Naa cadi nácadiaʼ guirutiʼ. Ximodo guneʼ ndiʼ yaʼ. Ne pa chaa zábicabe naa: Tu laa biseenda lii. Xi guiniéʼ óraque yaʼ.
Ndiʼ nga ni gabuʼ laacabe, na Dios rabi laabe. JIOBÁ, Dios stiʼ Abraham, Dios stiʼ Isaac ne Dios stiʼ Jacob nga biseenda naa ra nuutu. Ne de raqué guniruʼ Jiobá: Ndiʼ nga laʼyaʼ ni qué ziuu dxi guidxaa.
Peru, pa qué guni crécabe naa ora gabe laacabe lii biseenduʼ naa pue, na Moisés rabi laabe.
Xi naazeluʼ, gunabadiidxaʼ Dios laabe.
Moisés bicabi: Ti vara.
Bilaani layú, na Dios rabi laabe. Ora biʼniʼ Moisés ni la? vara que gúcani ti beendaʼ. Óraque Jiobá biluiʼbe Moisés sti milagru. Rábibe laa: Guluu naluʼ ndaaniʼ xhábaluʼ. Moisés biʼniʼ ni, ne ora guleebeni la? ¡guizáʼ naquichibeni casi ñebe! Riluiʼpeʼ huarabe de lepra. Ra bionna milagru que la? Jiobá bidiibe poder Moisés para guni ni. Maʼ para guilúxebe guniʼbe sicaríʼ: Ne ca milagru riʼ la? ca israelita zuni crecaʼ de que naa biseendaʼ lii.
Despué bibiguetaʼ Moisés ralidxi, ne gúdxibe Jetró: Xiñee qué gudiiluʼ lugar guibiguetaʼ Egipto, ti guuyaʼ ximodo nuu ca binnilidxeʼ. Jetró bidii lugar guibiguetaʼ Moisés Egipto.
