Ododo 31

Moses gin ki Aron Gucito ka Neno Parao

IKARE ma Moses odok Ejipt, en otito lok ducu i kom tango magi bot ominne Aron. Dok i kare ma Moses gin ki Aron gunyuto tango magi bot Luicrael, gin ducu guye ni Jehovah kara tye kwedgi.

Cutcut i nge meno Moses gin ki Aron gucito ka neno Parao. Gin guwacce ni: ‘Jehovah, ma en aye Lubanga pa Icrael owaco ni, “Wek jona gucit pi nino adek, ci gitwero wora i dye tim.” ’ Ento Parao ogamo ni: ‘An pe aye lok pa Jehovah, dok an pe abiye ni Icrael owoti.’

Kiniga omako Parao, pien jo-ni onongo gimito balo kare me tic wek ginong kare me cito ka woro Jehovah. Pi meno en odiyogi me tic matek dok makato. Luicrael gukok i kom Moses pi kit marac ma onongo kitimogi kwede, dok man ocwero cwiny Moses. Ento Jehovah owacce ni pe opar. Jehovah owaco ni: ‘Abimiyo Parao weko jona giwoto.’

Moses gin ki Aron dok gudok ka neno Parao. I kare man gin gutimo tango. Aron obolo odoone piny, ci odoko twol madit. Ento luryeko pa Parao bene gubolo odoogi piny, ci twol mapol onen. Ento nen kong ba! Twol pa Aron tye ka camo twol pa luryeko ca woko. Kadi bed kumeno Parao pud pe oye ni Luicrael guwoti.

Pi meno kare oromo wek Jehovah omi pwony bot Parao. In ingeyo kit ma en otimo kwede? En okelo jami maraco, nyo ayelayela madongo apar, i kom Ejipt.

I nge kanyo pwod mapol, Parao olwongo Moses, ci owaco ni: ‘Juk jami maraco-ni woko, ci aweko Icrael woto.’ Ento ka pwod moni ogik, Parao loko tamme woko. En pe weko dano giwoto. Ento motmot, i nge pwod me 10, Parao ocwalo Luicrael gucito woko.

In ingeyo pwod 10 magi ducu ki acel acel? El pot karatac-ci wek wapwony lok i komgi.

Nia 4:27-31; 5:1-23; 6:1-13, 26-30; 7:1-13.