MOYSE wiñotulu Egipto mu, feypifi ñi peñi Aaron ti pu afmatun dungu. Ka Moyse Aaron engu pengelfi ta pu Israel che feychi pu afmatun dungu, kom feyentuyngün Jewba ñi mülen kidu engu mu.

Fey mew Moyse ka Aaron amuyngu ñi pemeafiel Faraon. Feypifingu: ‘Jewba Israel ñi Ngünechen feypi: “Elunge ñi amual tañi pu che küla antü mew, ñi poyeaetew engün wellin mapu mew.”’ Welu Faraon feypi: ‘Iñche feyentukelan Jewba mu. Elulayafiñ tañi amual tati pu Israel che.’

Illkuy (lladküy) Faraon, pinolu küdawal engün küla antü mu fey ñi poyeafiel Jewba. Feymu lle, doy küdawülfi engün. ‘Eymi tami duam mew, wedalkamekengeiñ’, pu Israel che feypifi ta Moyse. Moyse müna weñangküy. Welu Jewba feypieyew: ‘Duamkülekilnge’, pi. ‘Iñche feman Faraon ñi eluñmayaetew ñi amual ñi pu che,’ pi.

Moyse Aaron engu ka amuyngu ñi pemeafiel Faraon. Tüfa wüla dewmay ta kiñe afmatun dungu. Aaron ütrüfnakümi ñi retrü ti mapu mu, ka feychi kiñe fütra filukünuwi. Welu Faraon ñi pu kalku wentru, kafey ütrüfnakümi ñi pu retrü engün mapu mew, ka pewfaluwi pu filu. Welu ¡lelinge! Aaron ñi filu petu ifi feyti pu kalku wentru ñi pu filu. Petu pilay Faraon ñi elkünuafiel pu Israel che ñi amual.

Feymu lle akuy ti antü, Jewba ñi wedakechi kimelafiel ta Faraon. ¿Kimimi chumngechi ñi femfiel? Eluñmafi ñi küpayal mari fütrake wedake dungu Egipto mu.

Fentren fütrake weda dungu mew rupalelu, Faraon mütrümfi ta Moyse ka feypifi: ‘Katrütufinge ti weda dungu, ka eluan ñi amual ti Israel che.’ Welu ti fütrake weda dungu katrütuel ka weluletuy ñi pin. Eluñmalayafiñ ñi amual pi. Welu rupalu ti maringelu weda dungu feypifi ñi amual engün.

¿Kimimi kiñekentu ti mari fütrake wedake dungu? Rulpange ti pakina, ka peafiyiñ chuchi ngen.