KAN Moiz ti retourn Lezip, i ti rakont son frer Aaron sa bann mirak. E kan Moiz ek Aaron ti montre bann Izraelit sa bann mirak, tou dimoun ti krwar ki Zeova i avek zot.

Apre Moiz ek Aaron ti al vwar Faraon. Zot ti dir li: ‘Zeova Bondye Izrael i dir, “Les mon pep ale pour trwa zour, afen ki zot ava kapab ador mwan dan dezer.” ’ Me Faraon ti reponn: ‘Mon pa krwar dan Zeova. E mon pa pe les Izrael ale.’

Faraon ti ankoler, akoz bann dimoun ti oule letan lib pour ador Zeova. Alor i ti fors zot pour travay pli dir. Bann Izraelit ti blanm Moiz akoz zot pe ganny trete vreman dir, e Moiz ti sagren. Me Zeova ti dir li pa trakase. ‘Mon pou fer Faraon les mon pep ale,’ Zeova ti dir.

Moiz ek Aaron ti al vwar Faraon ankor. Safwasi zot ti fer en mirak. Aaron ti zet son baton ater, e i ti vin en gro serpan. Me bann zonm Faraon ki ti malen zot osi zot ti zet zot baton ater, e bann serpan ti aparet. Me, gete! serpan Aaron pe manz bann serpan sa bann zonm malen. Faraon ti kontinyen pa les bann Izraelit ale.

Aprezan ti’n ler pour Zeova fer Faraon aprann en leson. Eski ou konnen ki i ti fer? I ti anmenn 10 fleo oubyen gran maler lo Lezip.

Apre plizyer fleo Faraon ti anvoy kriy Moiz, e i ti dir: ‘Aret sa fleo, e mon pou les Izrael ale.’ Me kan sa fleo ti pou arete Faraon ti pou sanz son lide. I pa ti pou les sa bann dimoun ale. Me, finalman, apre dizyenm fleo, Faraon ti les bann Izraelit ale.

Eski ou konn sa 10 fleo? Vir paz e nou a vwar.