NI YACO yani o Mosese i Ijipita, a tukuna sara vei Eroni na tuakana na veika me baleta na cakamana. Ni rau vakaraitaka vei ira na Isireli, era vakabauta sara ga ni tiko vata kei rau o Jiova.

Rau sa qai lai raici Fero o Mosese kei Eroni. Erau kaya vua: ‘E kaya mai o Jiova na Kalou ni Isireli, ‘Laiva mera lai qaravi au na noqu tamata ina lekutu me siga tolu.’ Sauma yani o Fero: ‘Au sega ni kilai Jiova. Au na sega tale ga ni soli ira na Isireli mera lako.’

E vakacudrui Fero nodra via cegu mai na cakacaka na Isireli mera lai qaravi Jiova. Sa qai binia ga yani vei ira na cakacaka. Ra beitaki Mosese na Isireli ni vakavuna nodra bula dredre mani rarawa sara kina vakalevu o koya. Ia, e kaya vua o Jiova me kua ni lomaleqa: ‘Au na cakava me sereki ira na noqu tamata o Fero.’

Rau se baci lai raici Fero tale o Mosese kei Eroni, rau qai vakaraitaka vua na cakamana. A vuki me dua na gata levu na ititoko i Eroni ni viritaka ena fuloa. Era kacivi mai na tamata vuku i Fero mera cakamana, ia era vukica tale ga me gata na nodra ititoko. Sega ni bera sa qai tiloma kece na nodra gata na tamata i Fero na gata i Eroni. Ia, e bese tiko ga ni laivi ira na Isireli o Fero mera lako.

A qai vakavulici Fero o Jiova. O kila e cakava vakacava? E tauca vei Ijipita e tini na kuita se leqa lelevu.

Ni tau oti e so na kuita, a kaya vei Mosese o Fero: ‘Sa rauta na kuita, au na laivi ira na Isireli mera lako.’ Ni sa oti ga na kuita, e baci bese tale o Fero. Ia, ni tau oti na ikatini ni kuita, sa qai laivi ira dina na Isireli o Fero mera lako.

O bau kilai ira yadua na kuita oqori? Rai ina tabana e tarava mo vulici ira.