NIITAAPA Moisés Egiptomüin, nüküjüin nümüin Aarón chi nuwalakai süchiki tü kasa pülasükat. Naainjapa shia noʼupala na israeliitakana, nanoujuin nuluwataalain nia Maleiwa.

Nuʼunaka Moisés otta Aarón nipialuʼumüin Faraón. Namaka nümüin: ‹Müsü nünüiki Jeʼwaa, chi namaleiwasekai na israeliitakana: «Püjüta na israeliitakana süpüla naʼwaajüin taya isashiipaʼa soʼu 3 kaʼi»›. Nümaka Faraón: ‹Manoujuinsai taya nünain Jeʼwaa. Nnojoishi tajütüinjanain na israeliitakana›.

Jashichika maʼin Faraón süka nakataleein kaʼi na israeliitakana süpüla naʼwaajüin Maleiwa, Niʼyateʼeraka maʼin naya. Nia kasitka nümünaka Moisés, mojuka naaʼin sutuma tia, akaisaʼa nia nnojoluinjatü mojuin naaʼin naashin Jeʼwaa, nümaka nümüin: ‹Nüjüteena Faraón na israeliitakana tatuma›.

Nuʼunaka Moisés otta Aarón nachikuaʼa nipialuʼumüin Faraón, naainjaka wanee kasa pülasü. Nujutaka nunuʼuse Aarón mmoluʼumüin, wüijaaka miyoʼu shia. Nojutaka nanuʼuse na ooʼulaküliikana nümüin Faraón wüijaaka shia. Akatsaʼa tü wüi miyoʼukat shiküin tü wanee wüikalüirua. Ayatüshi Faraón nnojoluin nüjütüin na israeliitakana.

¿Kasa alataka nümüin Faraón nutuma Jeʼwaa? Alatüsü nümüin 10 kasa mojusü.

Sülatapa wainma kasa mojusü nümüin, neenajüin Moisés sümaa nümüin: ‹Püshaʼwaleʼera toulia tü kasa mojusükat, tajüteenaka na israeliitakana›. Nüshaʼwaleʼerapa shia, nnojoishii nüjütüin. Süchikijee tü chiiruaajatkat kasa mojusü alataka nümüin nüjütaka naya.

¿Pütüjaa aaʼu kasa tia poloosükat kasa mojusü? Pülatira süpana tü karalouktakat süpüla wekirajaain sünain.