Kukwe kira 31

Moisés, Aarón juani Faraón ie

MOISÉS nikaninta Egipto angwane, jondron ñan tuabare tuani kwe ye niebare kwe Aarón ie. Moisés bätä Aarón käkwe jondron ñan tuabare ye mikani tuare nitre Israel ie angwane, Jehová nämene niaratre yebe namani gare ietre.

Moisés bätä Aarón nikani Faraón känti. Niebare kwetre ie: ‘Jehová Ngöbö nitre Israel kwe tä niere: “Köbömä te juta tikwe tuenmetre niken ti mike täte kä ngwarbe nötare yekänti.”’ Akwa Faraón niebare: ‘Jehová ñaka metre tikrä. Ti ñaka nitre Israel tuainmetre niken.’

Nitre Israel tö namani sribi tuainmetre Jehová mikakäre täte, yebätä Faraón namani rubun. Yebätä mikani sribire bäri ja dibiti kwe. Nitre Israel mikani ja tarenike yebätä namani Moisés mike ngite, aune Moisés namani ulire. Akwa ñaka töibikadre kwe Jehová niebare ie. ‘Tikwe Faraón töi mikai juta tikwe tuenmetre niken,’ niebare kwe.

Moisés bätä Aarón nikaninta Faraón känti. Ye ngwane jondron ñan tuabare nuainbare kwetre. Aaronkwe krimana kwe kitani tibien aune nikwitani kulebra kri. Akwa nitre töbätä Faraonkwe, käkwe krimana kwetre kitani tibien arato aune nikwitani kulebrare. Akwa ¡mike ñärärä! kulebra Aaronkwe kätä kulebra nitre töbätä kwe ye ñainkä. Faraonkwe ñaka nitre Israel juani.

Yebätä Jehová kukwe ja tökrä mikani gare Faraón ie. ¿Nuainbare ño kwe gare mäi? Kukwe keta jätä tare mikani nemen bare kwe nitre Egipto yebiti.

Kukwe tare keta kabre namani bare, ye bitikäre Faraón namani Moisés kärere aune namani niere ie: ‘Kukwe tare ye ötö nunbätä aune tikwe nitre Israel juain.’ Akwa kukwe tare nämene nekä angwane niara nämene ja töi kwite. Ñaka nämene tuenmetre niken. Akwa kukwe tare keta jätä, ye bitikäre nitre ye juani kwe.

¿Kukwe tare keta jätä jene jene ye gare mäi? Ani mike gare jai página kwäräkri.

Éxodo 4:27-31; 5:1-23; 6:1-13, 26-30; 7:1-13.