MOSE be Aigupito dekenai ia giroa neganai, idia vara hoa karadia be ena kakana Arona dekenai ia gwauraia. Mose bona Arona ese unai hoa karadia be Israela taudia dekenai idia hahedinaraia neganai, taunimanima ibounai idia abia dae Iehova be idia danu ia noho.

Unai murinai Mose bona Arona be Farao itaia totona idia lao. Ia idia hamaoroa: ‘Israela taudia edia Dirava, Iehova ia gwau, “Lau egu taunimanima oi siaia lao taunimanima idia noho lasi tanona dekenai, dina toi lau idia tomadiho henia totona.” ’ To Farao ia haere: ‘Lau be Iehova lau abia dae lasi. Bona Israela taudia do lau siaia lao lasi.’

Farao ia badu, badina taunimanima idia ura nega sisina gaukara idia rakatania, Iehova idia tomadiho henia totona. Unai dainai edia gaukara ena hekwarahi ia habadaia. Israela taudia be idia abia hisihisi dainai idia ese kerere be Mose dekenai idia atoa, bona Mose ia lalohisihisi. To Iehova ese Mose ia hamaoroa do ia laloa momo lasi. Iehova ia gwau: ‘Farao ena lalona do lau haidaua bona egu taunimanima do ia siaia.’

Mose bona Arona idia lao Farao idia itaia lou totona. Unai neganai hoa karana ta idia karaia. Arona ese ena au ia negea diho, bona gaigai badana ai ia lao. To Farao ena aonega taudia ese edia au idia negedia diho danu, bona gaigai idia hedinarai. To, itaia! Arona ena gaigai ese aonega taudia edia gaigai ia ania ore noho. To Farao ese Israela taudia ia siaia lasi.

Unai dainai nega ia ginidae Iehova ese gau haida amo Farao do ia hadibaia namonamo. Unai ia karaia dalana oi diba, a? Aigupito dekenai hisihisi badadia 10 ia siaia.

Unai hisihisi haida idia ore neganai, Farao ese Mose ia boiria, bona ia gwau: ‘Hisihisi oi koua, bena Israela taudia do lau siaia lao.’ To hisihisi ia ore neganai, Farao ese ena lalona ma ia haidaua lou. Taunimanima ia siaidia lasi. To hisihisi namba 10 ia ore murinai, Farao ese Israela taudia ia siaia.

Unai hisihisi 10 oi diba, a? Inai rau oi kehoa bona do ita diba.