Ngewa ya 31: Mose na Aluni Kwonana na Valao
YĨLA Mose wasyokie Misili, nĩwatavisye Aluni mwana-a-inyia ũvoo w’onthe ĩũlũ wa ila syama. Na yĩla Mose na Aluni moonisye Aisilaeli syama isu, andũ onthe maĩkĩĩa kana Yeova e vamwe namo.
Na ĩndĩ Mose na Aluni maenda makamwone Valao. Namo mamwĩa: ‘Ũũ nĩw’o Yeova Ngai wa Isilaeli ũnũkwasya, “Lekya andũ makwa mathi kyalo kya mĩthenya ĩtatũ, nĩ kana makanthembee weũnĩ.”’ Ĩndĩ Valao asũngĩa: ‘Nyie ndimwĩsĩ Yeova. Na ndilekya Aisilaeli mathi.’
Valao nĩwathilĩkile nũndũ andũ nĩmendaa kũtia wĩa nĩ kana makamũthaithe Yeova. Kwoou amathũkũmĩthya na vinya mũno vyũ. Na Aisilaeli matalĩla Mose mavĩtyo nũndũ wa ũthũku ũla meekawa, na Mose eew’a kyeva. Ĩndĩ Yeova amwĩa ndakamake. Nake asya, ‘Ngatuma Valao alekya andũ makwa mathi.’
Na Mose na Aluni mathi makonane na Valao ĩngĩ. Na ĩvinda yĩu nĩmeekie kyama. Aluni ekisye ndata yake nthĩ, nayo yatw’ĩka nzoka nene. Ĩndĩ andũ oĩ ma Valao o namo mekya ndata syoo nthĩ na syatw’ĩka nzoka. Ĩndĩ, kwasisya! Nzoka ya Aluni nĩkũmelya nzoka sya andũ asu oĩ. O na kũilyĩ ũu, Valao ndaalekya Aisilaeli mathi.
Kwoou ĩvinda nĩyavikie ya Yeova kũmanyĩsya Valao ĩsomo. We nĩwĩsĩ eekie ũu ata? Aetie mothĩny’o 10, kana monyamasyo manene mũno ĩũlũ wa nthĩ ya Misili.
Ĩtina wa maingĩ ma mothĩny’o asu, Valao nĩwatũmanaa Mose na aimwĩa: ‘Vetanga ũthĩny’o ũũ, nakwa nĩngũlekya Aisilaeli mathi.’ Ĩndĩ ũthĩny’o wavetangwa, Valao nĩwalyũlaa mesilya. Ndeetĩkĩlaa kũmalekya mathi. Ĩndĩ, mũminũkĩlyonĩ, ĩtina wa ũthĩny’o wa 10, Valao nĩwalekilye Aisilaeli mathi.
We nĩwĩsĩ kĩla ũmwe wa mothĩny’o asu 10? Alyũla kathangũ kaa ngalĩko ĩsu ĩngĩ na ekai ĩndĩ twĩmanyĩsye ĩũlũ wamo.
Kuma 4:27-31; 5:1-23; 6:1-13, 26-30; 7:1-13.
Makũlyo
- Syama ila Mose na Aluni meekie, syatumie Aisilaeli meka ata?
- Mose na Aluni meeie Valao ata, nake Valao amasũngĩie ata?
- O tondũ kwonanĩtw’e vaa visanĩ, kweekĩkie ata yĩla Aluni wekisye ndata yake nthĩ?
- Yeova asomethisye Valao ĩsomo ata, nake Valao eekie ata?
- Kweekĩkie ata ĩtina wa ũthĩny’o wa ĩkũmi?
Makũlyo ma kwongeleela
- Soma Kuma 4:27-31 na 5:1-23.
Valao endaa kwonany’a ata yĩla waisye ũũ: “Ndimwĩsĩ Yeova”? (Kuma 5:2; 1 Sam. 2:12; Alo. 1:21)
- Soma Kuma 6:1-13, 26-30.
Nĩ kwa nzĩa myaũ Yeova ũtaaeka amanyĩke nĩ Avalaamu, Isaka na Yakovo? (Kuma 3:13, 14; 6:3; Mwa. 12:8)
Kũmanya kana Yeova nĩwatũmĩie Mose, o na vala Mose eew’aa ateanĩe kũtethya wĩa ũla wanengiwe, kwaĩle ũtuma twĩw’a ata? (Kuma 6:12, 30; Luka 21:13-15)
- Soma Kuma 7:1-13.
Yĩla Mose na Aluni matavisye Valao kwa ũkũmbaũ motw’ĩo ma Yeova, maiĩie athũkũmi ma Ngai ma ũmũnthĩ ngelekany’o myaũ? (Kuma 7:2, 3, 6; Meko 4:29-31)
Yeova oonanisye ata kana ena ũtonyi mwingĩ kũthonoka ngai sya Misili? (Kuma 7:12; 1 Mav. 29:12)
