Esimwititi 31: Mosesa naArona tava zi kwaFarawo
MOSESA apa ga ka tengwire koEgipite, ta tantere mukurwendi Arona nayinye kuhamena yitetu. Ano Mosesa naArona apa va likidire Vaisraeli yitetu eyi, vantu navenye tava pura asi Jehova kwa kere nawo.
Mosesa naArona makura tava zi kwaFarawo. Awo tava mu tantere asi: ‘Jehova Karunga gwaIsraeli ta tanta asi: “Siga mbunga zange zi ze mazuva gatatu, yipo va ka karere nge momburundu.”’ Nye Farawo ta limburura asi: ‘Ame kapi na pura mwaJehova. Ame hena kapi nani siga Israeli a ze.’
Farawo kwa handukire, morwa vantu kwa here epwizumuko koyirugana va ka kanderere Jehova. Makura ta va sininike va rugane nye unene kupitakanena. Vaisraeli kwa pere Mosesa usima konkedi zondona omu ngava va tekura, ano Mosesa ta guwu. Nye Jehova ta mu tantere a pire kulipakera sinka. Jehova ta tanta asi: ‘Ame ngani ninka Farawo a sige vantu vange va ze.’
Mosesa naArona tava zi hena kwaFarawo. Sikando esi tava ka rugana ko sitetu. Arona ta zuguma mpango zendi, makura tazi lisitunuka emuzoka lyemunene. Nye vagara wovanongo vaFarawo nawo tava zuguma nompango dawo, ano mazoka makura taga moneka. Nye, tara si! Ezoka lyaArona kuna kulya po mazoka govagara wovanongo. Nye Farawo simpe nokusiga si Vaisraeli va ze.
Makura siruwo tasi siki mo yipo Jehova a tengeke Farawo. Wa diva asi ngapi omu ga yi rugene eyi ndi? Mokureta mahepeko ndi maudigu gomanene 10 koEgipite.
Konyima zomahepeko gomanzi aga, Farawo kwa zigidire Mosesa nokutanta asi: ‘Hageka ehepeko, makura ame nani siga Israeli a ze.’ Nye nsene ehepeko lina haga, Farawo ta rundu mutwe. Age nokusiga si vantu va ze. Nye moruhura, konyima zehepeko lyo-10, Farawo ta sigi Vaisraeli va ze.
Wa diva mahepeko nagenye 10 ndi? Penuna epenuno tu lironge ko yokugahamena.
Exodus 4:27-31; 5:1-23; 6:1-13, 26-30; 7:1-13.
Mapuro
- Yitetu eyi va rugene oMosesa naArona, ngapi omu ya kundamene Vaisraeli?
- Yinke va tanterere oMosesa naArona Farawo, ntani elimbururo lyendi musinke lya kere?
- Moomu vana yi likida mefano, yinke ya horokere apa ga zugumine Arona mpango zendi?
- Ngapi omu Jehova ga tengekere Farawo, ntani ngapi omu ga limbwilire Farawo?
- Konyima zehepeko lyomurongo, yinke ya horokere?
Mapuro gokugwederera ko
- Resa Exodus 4:27-31 ntani 5:1-23.
Yinke ga tembe Farawo apa ga uyungire asi: “Eraka lyahompa ke eli nani purakena”?
- Resa Exodus 6:1-13, 26-30.
Moukaro musinke ga dilire Jehova kulidivisa mwene kwaAbirahamu naIsaka ntani naJakopo?
Ngapi omu atu lizuvhu pokudiva asi Jehova simpe ga ruganesere Mosesa, nampili ngomu Mosesa nga lizuvhire asi kapi ga waperere kosirugana sendi?
- Resa Exodus 7:1-13.
Apa va geve oMosesa naArona noupampi nompanguro daJehova kwaFarawo, sihonena musinke va tulire po kovakareli vaKarunga naina?
Ngapi omu Jehova ga likidire unankondo wendi koyikarunga yaEgipite?
