MPANJI 31

Mosi niAroni Anayi Nakudimona naFwaro

CHAFUNTILIYI Mosi kuEjipitu, wamulejelimu mana kwindi Aroni nsañu yejima yayihayamisha. Dichi aMosi niAroni chayimwekesheliwu iyi yihayamisha kudi aIsarela, antu ejima etejeli nawu Yehova wadiña nawu.

Chalondelelihu Mosi niAroni ayili nakudimona naFwaro. Amulejeli nawu: ‘Yehova Nzambi yaIsarela nahoshi nindi: “Lekaku antu ami ayi njila yamafuku asatu, akadifukuli kudami mwisaña.”’ Ilaña Fwaro wakwili nindi: ‘Hinakuhwelela mudi Yehovaku. Nawa hinukuyileka aIsarela nami ayiku.’

Fwaro wahilili muloña antu akeñeleña kushiya nyidimu nawu akadifukuli kudi Yehova. Dichi wayikanjikijili kuzata kubadikahu chikupu. A Isarela amwinkeli Mosi muloña nawu yena diyi wunakojeji kulonda ayili katama, ichi chamuneñesheli Mosi. Ilaña Yehova wamulejeli nindi bayi akamenaku. Yehova wahosheli nindi, ‘Nukumwilisha Fwaro kulonda aleki antu ami ayi.’

Mosi niAroni ayili nakudimona naFwaro cheñi. Iyi mpinji amwekesheli chihayamisha. Aroni wanatili mbwechi yindi hamaseki, yabalumukili kapela weneni. Dichi akwamaana aFwaro niwena anatili jimbwechi jawu hamaseki, jabalumukili tupela. Ilaña, talaña! Kapela kaAroni kanakuminya tupela twawa kwamaana. Hela chochu Fwaro hayilekeli aIsarela kuyaku.

Dichi mpinji yashikili yakumubabesha Fwaro kudi Yehova. Wuneluki cheliliyi? Chadiña hikuleta kwayipupu 10, hela netu kukala kweneni muEjipitu.

Hanyima yayipupu yayivulu, Fwaro watambikili Mosi nakuhosha nindi: ‘Lekaku kwila yipupu, nukuyileka aIsarela kulonda ayi.’ Ilaña neyi chipupu chinaleki, Fwaro wadiña nakuhimpa maanindi. Hayitejeleña antu kuyaku. Nkumininaku, hanyima yayipupu 10, Fwaro wayilekeliku aIsarela.

Wunayiluki yipupu yejima 10? Bakulaku ifu kulonda tuyiluki yipupu yeniyi.

Kwidika 4:27-31; 5:1-23; 6:1-13, 26-30; 7:1-13.