TEJ tmeltzʼaj Moisés toj tnam Egipto, xi ttxʼolbʼaʼn aʼyejo techil te Aarón aju terman. Atzun tej t-xi tyekʼen Moisés ex Aarón aqejo techel kye aj Israel, kykyaqilx el kynikʼ qa attaq Jehová tukʼe Moisés ex tukʼe Aarón.

I eʼxtzun Moisés tukʼe Aarón twitz Faraón. Ex xi kyqʼmaʼn te: ‹A Jehová aju kyDios aj Israel ma tzaj tmaʼn kyjalu: Che ttzoqpintza qeʼ xjal etzan wuʼne, tuʼn kynimen oxe qʼij weye tuj tzqij txʼotxʼ›, che chi. Xitzun ttzaqʼweʼn Faraón kye: ‹Mitiʼ ojtzqiʼn Jehová wuʼne. Mlay che ex ntzaqpiʼne qeʼ aj Israel›.

Otaq tzaj tqʼoj Faraón, tuʼnjo kyajbʼiltaq aj Israel tuʼn tel kyiʼn ambʼil tiʼj kyaqʼun, tuʼntzun kyxiʼ kʼulil twitz Jehová. Tuʼntzunjo, xi tqʼoʼn mastl kyaqʼun. Ok kyqʼoʼn aj Israel tpaj Moisés tuʼnjo e kubʼ yajinxixtl, tzaj tbʼis Moisés tuʼn jlu. Ok tqʼuqbʼaʼn Jehová tkʼuʼj ex xi tqʼamaʼn te: ‹Kbʼantel wuʼne tuʼn ttzaj ttzaqpiʼn Faraón ntname›.

I eʼx juntl maj Moisés ex Aarón twitz Faraón. Tuj ambʼil lu kubʼ kyyekʼin jun techil. Kubʼ t-xoʼn Aarón ttzeʼ twitz txʼotxʼ, ex jaw tmeltzʼun tibʼ jlu te jun kan nintzku, moqa te jun matijxix kan. Ax ikx kye ajnabʼil te Faraón kubʼ kyxoʼn kytzeʼ twitz txʼotxʼ, ax ikx e ok te kan. ¡Kiʼnke! ¿Tiʼ nbʼaj? Aju tkan Aarón nxi tbʼilqʼuʼn aju kykan ajnabʼil. Nix tuʼn jlu mitiʼ etz ttzaqpiʼn Faraón qeʼ aj Israel.

Tuʼntzunjo, pon ambʼil tuʼn t-xi tyekʼe Jehová tipumal te Faraón. ¿O tbʼiye tiʼ bʼent tuʼn? Tzaj 10 kʼixbʼisabʼil kyibʼaj aj Egipto tuʼn.

Tbʼajlenxi junjo kʼixbʼisabʼil, ntzajtaq ttxkoʼn Faraón Moisés ex nxiteq tqʼmaʼn te: ‹Qʼimila kʼixbʼisabʼil ex oktzen chi elex ntzaqpiʼne aj Israel›. Tejtzun otaq tzʼel kyiʼn Moisés kʼixbʼisabʼil, nchʼixpujteqtl t-xim Faraón. Mitiʼtaqtl nchex ttzaqpiʼn. Atzun tej tbʼaj lajaj kʼixbʼisabʼil, xi tqʼamaʼn kye tuʼn kyex.

¿Ojtzqiʼn qeʼ 10 kʼixbʼisabʼil tuʼne? Qo ikʼx toj juntl t-xaq tuʼntzen tel qnikʼ kyiʼj.