Tanojnots 31

Moisés uan Aarón kiitatoj Faraón

KEMAN Moisés mokepak Egipto, kitapouij ikniuj Aarón mouiskatekimej tein Dios kinextilij. Uan keman Moisés uan Aarón kininextilijkej israelitas mouiskatekimej, nochin kineltokakej ika Jiova imiuan yetoya.

Satepan, Moisés uan Aarón kiitatoj Faraón. Kiiluijkej: ‘Jiova, iDios Israel kijtoua: “Xikaua Israel eyi tonal, maj nechueyichiuatij taluakyan”’. Sayoj ika, Faraón kijtoj: ‘Amo nikixmati Jiova uan amo nikauas maj youi Israel’.

Faraón kualantoya, porin israelitas kinekiaj kikauaskej tekit uan kiueyichiuatiuij Jiova. Yejika, okachiok kinteltekitiltij. Israelitas kipantijkej Moisés keman okachiok kinteltekitiltijkej, uan Moisés moteltayokoltij. Sayoj ika, Jiova kiiluij maj amo teyi moluiani. Kijtoj: ‘Nikchiuas maj Faraón kinkaua maj yakan israelitas’.

Moisés uan Aarón oksepa yajkej kiitatoj Faraón. Ijkuak, kichiujkej se mouiskatekit. Aarón kitamotak talpan ikuouj, uan mokepak se ueyi kouat. Uan tamatinij tein kinpiaya Faraón no kitamotkej talpan imin kuoujuan, uan no mokepkej kouamej. Sayoj ika, ¡xikita! kouat tein iaxka Aarón kinkuajtok kouamej tein imin axkauan tamatinij. Uan amo ika nejon kinekik Faraón kinkauas maj yakan israelitas.

Yejika Jiova kiitak ika monekiaya okachi kinextilis ichikaujkauelilis, Faraón. ¿Tikmati keniuj kichiuak? Kichiuak maj kiajsini Egipto majtakti chauismej, oso uejueyi ouijkayomej.

Keman panouaya se ome eyi chauis, Faraón kinotsaya Moisés uan kiiluiaya: ‘Xikijkuani chauis uan nikauas maj youi Israel’. Sayoj, keman chauis mijkuaniaya, motanemililispataya uan amo kinkauaya maj yakan. Sayoj ika, keman panok majtakti chauis kiniluij maj yanij.

¿Tikixmati sejse majtakti chauismej? Xikixkepa amat uan maj tikitakan katiyejuan.

Éxodo 4:27-31; 5:1-23; 6:1-13, 26-30; 7:1-13.