MI MENGI rä Moises ha Ejipto, bi xipi rä Aron, rä ku, de nuꞌu̱ yä milagro. ꞌNepu̱ rä Moises ꞌne rä Aron bi ꞌñuti yä israelita nuꞌu̱ yä milagro, ꞌne gatꞌho bi gamfri ge Jeoba go xki me̱hni.

Nubye̱, rä Moises ꞌne rä Aron bi ma bä nuu rä Faraon. ꞌNe bi ꞌñembi: “Jeoba näꞌä rä Zi Dada de Israel enä: «Hyopi dä bo̱ni mä hnini po hñupa, pa dä xo̱kämbenigi ha rä yꞌotꞌä hai»”. Pe rä Faraon bi ꞌñenä: “Nuga hindi kamfri Jeoba. Hingä ma gä hopi dä bo̱ni yä israelita”.

Rä Faraon xki nkue̱ ngeꞌä yä israelita mi ne xä zohni yä ꞌme̱fi pa xä xo̱kämbeni Jeoba. Hänge mänꞌa xa bi japi bi mpe̱fi. Nubye̱ yä israelita bi hyo̱xä rä thai rä Moises po näꞌä rä ntsꞌomꞌu̱i bi tꞌo̱ꞌtuäbi, hänge rä Moises xi bi durämu̱i. Pe Jeoba bi ꞌñembi ge hinxä durämu̱i. ꞌNe bi xipi: “Ma gä japi rä Faraon dä hye̱gi dä bo̱ni mä hnini”.

Rä Moises ꞌne rä Aron bi ma bä nuu rä Faraon mänꞌaki. Ha nunä rä mꞌiki, nuyu̱ bi ja nꞌa rä milagro. Rä Aron bi yꞌe̱i rä zaa ha rä hai, ꞌne bi mpu̱ngä däta kꞌeñä. Pe nuꞌu̱ yä bädi rä Faraon ꞌnehe bi yꞌe̱i yä zaa, ꞌne bi mpu̱ngä kꞌeñä. Pe, ¡hyandi!, rä kꞌeñä rä Aron bi dutꞌi nuyu̱ yä kꞌeñä yä bädi. Mäske njabu̱, rä Faraon himbi ne bi hye̱gi dä bo̱ni nuꞌu̱ yä israelita.

Hänge nubye̱ bi zo̱ho̱ näꞌä rä pa habu̱ rä Faraon ma xä bädi toꞌo Jeoba. ¿Gi pädi te bi me̱fi Jeoba? Bi me̱hni 10 yä plaga o yä däta xuñha ha gatꞌho Ejipto.

Mꞌe̱fa de bi thogi rꞌa yä plaga, rä Faraon mi nzofo rä Moises ꞌne mi embäbi: “Japi dä ntsaya näꞌä rä plaga ꞌne gä hopi dä bo̱ni yä israelita”. Pe nuꞌmu̱ mi tsaya näꞌä rä plaga, rä Faraon mi yobri ꞌne ya himi hopi dä bo̱ni. Pe mꞌe̱fa de näꞌä rä gäxä plaga nubye̱ hää bi hyopi bi bo̱ni.

¿Gi pädi kada nꞌa de nuꞌu̱ 10 yä plaga? Thogi ha näꞌä mänꞌa rä nxii pa gä pädihu̱.