DESPUES ku Moisés a regresá Egipto, el a konta su ruman Aaron tur kos tokante e milagernan. I ora Moisés i Aaron a mustra e israelitanan e milagernan, nan tur a kere ku Yehova tabata ku Moisés i Aaron.

E ora ei Moisés i Aaron a bai pa bishitá Fárao. Nan a bis’é: ‘Yehova e Dios di Israel a bisa, “Laga mi pueblo bai pa tres dia, pa nan por adorá mi den desierto.”’ Pero Fárao a kontestá: ‘Mi no ta kere den Yehova. I mi no ta laga Israel bai.’

Fárao a rabia pasobra e pueblo tabata ke tempu liber di nan trabou pa nan adorá Yehova. P’esei el a fòrsa e pueblo traha asta mas duru. E israelitanan a kulpa Moisés pa e maltrato ku nan a haña, i Moisés a sintié tristu. Pero Yehova a bis’é pa e no preokupá. ‘Mi ta hasi Fárao laga mi pueblo bai,’ Yehova a bisa.

Moisés i Aaron a bai bishitá Fárao atrobe. E biaha aki nan a hasi un milager. Aaron a tira su staf na suela, i el a bira un kolebra grandi. Pero e sabionan di Fárao tambe a tira nan staf na suela, i kolebra a presentá. Pero, mira! E kolebra di Aaron a kome e kolebranan di e sabionan. Tòg Fárao no a laga e israelitanan bai.

P’esei e tempu a yega pa Yehova siña Fárao un lès. Bo sa kon Dios a hasi esei? Dor di manda 10 plaga, òf difikultat grandi, riba Egipto.

Despues di vários di e plaganan, Fárao tabata yama Moisés i bis’é: ‘Laga e plaga stòp i lo mi laga Israel bai.’ Pero kada bes ku e plaga a stòp, Fárao tabata kambia di idea. E no a laga e pueblo bai. Pero finalmente, despues di e di 10 plaga, Fárao a manda e israelitanan bai.

Bo sa kiko kada un di e 10 plaganan tabata? Laga nos siña tokante nan.

Eksodo 4:27-31; 5:1-23; 6:1-13, 26-30; 7:1-13.