EGIPTOMAN kutiruspanmi Moisesqa wawqen Aaronman willarqa milagrokunamanta. Hinaptin Moiseswan Aaronqa milagrokunata Israel runakuna qawanankupaq ruraptinkum, paykunata Jehová Dios yanapasqanta creerqaku.

Hinaptinmi Moiseswan Aaronqa Faraonman rimaq rirqaku. Hinaspa nirqaku: ‘Israelpa yupaychasqan Jehová Diosmi nin: “Runaykunata kachariy kimsa punchaw chunniqpi yupaychawanankupaq”’ nispa. Faraonñataqmi nirqa: ‘Jehová Diospiqa manam ñoqaqa iñinichu. Manam Israel runakunataqa kachariymanchu’ nispa.

Faraonqa piñasqallañam karqa Israel runakuna llamkananku kachkaptin Jehová Diosta yupaychanankupaq tiempota usuchiyta munasqankumanta. Chaymi, as allinta runakunata llamkachirqa. Hinaptinmi Israel runakunaqa Moisesman tumparqaku paykunapa contranpi mana allinta rurasqankumanta, chaymi Moisesqa llakikururqa. Hinaptinmi Jehová Diosqa nirqa ama llakikuychu. ‘Faraonqa kacharinqapunim llaqtayta’ nispa.

Chaymi Moiseswan Aaronqa Faraonman rimaq kutirqaku. Hinaspa milagrota rurarqaku. Aaronmi tawnanta pampaman wischuykuptin hatun culebraman tikrakururqa. Faraonpa yachaysapa runankunapas tawnankuta pampaman wischuykuptinkum, chaykunapas culebraman tikrakururqaku. ¡Qaway! Aaronpa culebranmi yachaysapakunapa culebrankuta millpuchkan. Faraonqa manaraqmi chaywanpas kachariyta munarqachu.

Hinaptinmi tiempoña karqa Jehová Diosqa Faraonwan reqsichikunanpaq. ¿Yachankichu imaynatam chayta rurarqa? Egipto nacionta 10 llakikunapaq kaqkunawanmi castigarqa.

Achka kutita castigarachikuspanku Faraonqa Moisesta qayaspa kaynata niqmi: ‘Kayllapiñayá castigoqa sosegachun hinaptinqa Israel runakunataqa kacharisaqmi’ nispa. Castigokuna sosegaruptinmi ichaqa sonqonqa chaylla cambiaruq karqa. Hinaspa kachariqchuqaya. Chunka kaq castigopa qepantam ichaqa pasakunankupaq nirqa.

¿Reqsinkichu imakunam chay 10 castigokuna kasqanta? Qatiqnin willakuypim yachasunchik imakuna kasqanta.