I TE oki anga a Mose ki Aiphiti, kua akakite aia i te au temeio pouroa ki tona tuakana ko Aarona. E i te akaari anga a Mose raua ko Aarona i te au temeio ki te ngati Iseraela, kua irinaki ratou pouroa e tei ia raua a Iehova.

I reira kua aere a Mose raua ko Aarona i te aravei ia Pharao. Kua karanga raua kiaia e: ‘Te akakite maira te Atua o Iseraela ko Iehova e, “E tuku koe i toku iti tangata kia aere e toru ra, kia akamori ratou iaku i roto i te metepara.”’ Inara kua pau mai a Pharao e: ‘Kare au e irinaki ana ia Iehova. E kare au e tuku i te tamariki a Iseraela kia aere.’

Kua riri a Pharao, no tei inangaro te tangata i te akamutu i te angaanga kia akamori ia Iehova. No reira kua maro aia ia ratou kia angaanga pakari atu. Kua akaapa te ngati Iseraela ia Mose no tei kino atu te takinokino ia ratou, e kua taitaia a Mose. Tera ra kua akakite a Iehova kiaia e auraka e manamanata. ‘Ka maani au ia Pharao kia tuku i toku iti tangata kia aere,’ i tuatua ai a Iehova.

Kua oki akaou atu a Mose raua ko Aarona i te aravei ia Pharao. I teia taime kua rave raua i tetai temeio. Kua titiri a Aarona i tana rakau ki raro, e kua riro mai ei ovi maatamaata. Tera ra kua titiri katoa te au tangata kite pakari o Pharao i te au rakau ki raro, e kua riro mai ei au ovi. Akara ana ra! Te kai ra te ovi a Aarona i te au ovi a te aronga kite pakari. Kare rai ra oki a Pharao i tuku ana i te ngati Iseraela kia aere.

Kua tae i reira te taime no Iehova i te apii ia Pharao i tetai apiianga. Kua kite koe e i akapeea aia i te rave anga i te reira? Na te apai anga mai i te au mate 10, me kore i te au manamanata kino, ki runga ia Aiphiti.

Muri ake i te au mate e manganui, kua tiki atu a Pharao ia Mose e kua akakite e: ‘Akamutu koe i te mate, e ka tuku au i te au tamariki a Iseraela kia aere.’ Me akamutu ra te mate, kua taui a Pharao i tona manako. Kare aia i tuku i te iti tangata kia aere. Inara i te openga, i muri ake i te 10 o te mate, kua tuku i reira a Pharao i te ngati Iseraela kia aere.

Kua kite koe i te au mate 10 tataki tai? Uri mai i te kapi kia kite tatou i te reira.