TONGANA Moïse akiri na sese ti Égypte, lo sara tënë ti amiracle so kue na ita ti lo Aaron. Tongana Moïse na Aaron asara amiracle so na lê ti azo ti Israël, ala kue ayeda so Jéhovah ayeke na ala.

Na pekoni, Moïse na Aaron ague abâ Pharaon. Ala tene na lo: ‘Jéhovah Nzapa ti Israël atene: “Zia azo ti mbi ague na yando teti lango ota si ala voro mbi.” ’ Me Pharaon atene: ‘Mbi hinga Jéhovah pëpe na mbi yeke zia azo ti Israël ti gue pëpe.’

Ngonzo agbu Pharaon ngbanga ti so azo ti Israël aye ti zia kua ti ala ti gue ti voro Jéhovah. Tongaso, Pharaon asara si ala sara kua ngangu ahon ti kozo. Azo ti Israël atene ndali ti Moïse si ala yeke bâ pasi, na mawa asara Moïse. Me Jéhovah atene na lo ti gi bê ti lo pëpe. Lo tene: ‘Mbi yeke sara si azo ti mbi ague.’

Moïse na Aaron akiri ague abâ Pharaon. Ti so ni, ala sara mbeni miracle. Aaron abi keke ti lo na sese na a ga kota ngbo. Awandara ti Pharaon abi nga akeke ti ala na sese na a ga angbo. Me bâ! Ngbo ti Aaron amene angbo ti awandara so kue. Atâa so kue, Pharaon angbâ ti ke ti zia azo ti Israël ti gue.

Tongaso, ngoi asi awe ti tene Jéhovah afa mbeni ye na Pharaon. Mo hinga ye so lo sara? Lo tokua aye ti ngangu bale-oko na sese ti Égypte.

Na peko ti so mingi ti aye ti ngangu ni asi, Pharaon airi Moïse na lo tene: ‘Kaï aye ti ngangu so, na mbi yeke zia azo ti Israël ti gue.’ Na tongana ye ti ngangu ni akaï, Pharaon agbian tënë ti yanga ti lo na lo zia azo ti Israël ti gue pëpe. Tongana a si na ye ti ngangu ti bale-oko ni, Pharaon azia azo ti Israël ti gue.

Mo hinga aye ti ngangu bale-oko so oko na oko kue? Turne lembeti ni na bâ.