31-нҗи хекая

Муса билен Харун Фараоның янына баряр

МҮСҮРЕ доланып, Муса гөрен гудратларыны доганы Харуна гүррүң берди. Муса билен Харун ысрайыллылара гудратлары гөркезди. Шонда бүтин халк Ехованың халас этҗекдигине ынанды.

Соңра Муса билен Харун фараоның янына барып дийдилер: «Ысрайылың Худайы Ехова: «Чөлде маңа сежде эдер ялы, халкымы үч гүнлүк гойбер» дийди». Фараон болса оңа: «Мен Ехованы танамок, Ысрайылы болса гойбермерин» дийип җогап берди.

Фараоның гахары гелди, себәби халк Ехова сежде этмек үчин иши ташламакчы болярды. Шонуң үчинем ол халкы өңкүден-де бетер ишлетди. Ысрайыллылар болса мунуң үчин Мусаны гүнәкәрледилер. Муса муңа гаты гынанды. Йөне Ехова Муса гөвүнлик берип: «Мен фараона халкымы гойбердерин» дийди.

Муса билен Харун ене-де фараоның янына гелди. Бу гезек олар гудрат гөркездилер. Харун хасасыны зыңды велин, улы йылана өврүлди. Эмма фараоның акылдарлары хем хасаларыны зыңдылар, оларың хасалары-да йылана өврүлди. Йөне бу болян затлара серет! Харуның йыланы акылдарларың йыланларыны ювудяр. Шонда-да фараон ысрайыллылары гойбермеди.

Шонда Ехова фараона темми берип башлады. Нәдип темми беренини билйәңми? Ол Мүсүре он җеза, ягны он саны улы бетбагтчылык гетирди.

Фараон хер җезадан соң Мусаның ызындан адам иберип: «Бу җезаны айырсаң, Ысрайылы гойберейин» дийип ялбарярды. Йөне хер гезек җеза айрыланда, фараон пикирини үйтгедйәрди. Ол өңкүси ялы халкы гойберенокды. Эмма онунҗы җезадан соң, фараон ахыры Ысрайылы гойберди.

Бу җезаларың нәхили җезадыгыны билйәңми? Гел, муны индики сахыпадан билели.

Чыкыш 4:27—31; 5:1—23; 6:1—13, 26—30; 7:1—13.