Makani 31: Musa a Aloni Bamubona Falawo
MUSA naakajokela ku Ijipiti, wakamwaambila Aloni munyina maleele oonse ngaakabona. Musa a Aloni nibakabatondezya bana Isilayeli maleele aaya, bantu boonse bakasyoma kuti Jehova wakali ambabo.
Kumane Musa a Aloni bakaunka kwaakubona Falawo. Bakamwaambila kuti: ‘Jehova Leza wa Isilayeli wati, Leka bantu bangu baunke kwamazuba otatwe kutegwa bakandikombe munkanda.’ Pele Falawo wakaingula kuti: ‘Tandizyisyomi nzyaamba Jehova! Alimwi tandiko kubaleka bana Isilayeli kuunka.’
Falawo wakalikalade nkaambo bantu bakali kuyanda ciindi cakulyookezya kutegwa bakombe Jehova. Aboobo wakababelesya cankazi. Bana Isilayeli bakamutongooka Musa bayeeya mbobakali kupenzyegwa. Aboobo Musa wakausa. Pele Jehova wakamwaambila kuti atapengi. Jehova wakati: ‘Ndilacita kuti Falawo abaleke bantu bangu.’
Musa a Aloni bakaunka alimwi kwaakubona Falawo. Luno lweendo bakacita maleele. Aloni wawaala nkoli ansi, yasanduka yaba nzoka mpati. Pesi abalo bantu ba Falawo basongo bawaala nkoli zyabo, azyalo zyasanduka zyaba nzoka. Langa cicitika! Nzoka ya Aloni imena nzoka zyabantu basongo. Nokuba boobo, Falawo tanaabaleka bana Isilayeli kuunka.
Aboobo casika ciindi cakuti Jehova amusubule Falawo. Hena ulizyi mbwaakacita? Wakaleta zipenzyo zili 10 naa mapenzi aakatazyide mu Ijipiti.
Nozyakamana kucitika zipenzyo zinji, Falawo wakaita Musa akumwaambila kuti: ‘Leka zipenzyo ndilabaleka bana Isilayeli baunke.’ Pele kuti zipenzyo zyaleka, Falawo ulakonzya kucinca maano. Takonzyi kubaleka bantu kuunka. Pele naakacitikilwa cipenzyo ca 10, Falawo wakabaleka bana Isilayeli.
Hena ulicizyi cipenzyo acimwi cazyeezyi zili 10? Atuzyiiye.
Kulonga 4:27-31; 5:1-23; 6:1-13, 26-30; 7:1-13.
Mibuzyo
- Ncinzi maleele ncaakacita kubana Isilayeli ngaakacita Musa a Aloni?
- Ncinzi Musa a Aloni ncibakamwaambila Falawo, alimwi ino walo Falawo wakaingula buti?
- Kweelana ambokutondezyedwe acifwanikiso, ncinzi cakacitika Aloni naakawaala nkoli yakwe ansi?
- Mbuti Jehova mbwaakamuyiisya ciiyo Falawo, alimwi mbuti Falawo mbwaakacita?
- Ncinzi cakacitika nikwakacitika cipenzyo ca 10?
Mibuzyo aimwi
- Bala Kulonga 4:27-31 a 5:1-23.
Ncinzi Falawo ncaakali kwaamba naakaamba kuti: ‘Tandimuzyi Jehova naa nguni’? (Kul. 5:2; 1 Sam. 2:12; Balo. 1:21, Ci)
- Bala Kulonga 6:1-13, 26-30.
Muunzila nzi Jehova mbwaatakalibikka aatuba kuli Abbulahamu, Izaka a Jakobo? (Kul. 3:13, 14; 6:3; Matl. 12:8)
Mbuti mbotukonzya kulimvwa ikuzyiba kuti Jehova wakamubelesya Musa nikuba kuti Musa wakali kulimvwa kuti takonzyi kuubeleka mulimo ngwaakapegwa? (Kul. 6:12, 30; Lk. 21:13-15)
- Bala Kulonga 7:1-13.
Ino ncikozyanyo nzi Musa a Aloni ncibakatondezya kubabelesi ba Leza mazuba aano nibakaamba lubeta lwa Jehova cabusicamba kuli Falawo? (Kul. 7:2, 3, 6; Inc. 4:29-31)
Mbuti Jehova mbwaakatondezya kuti mupati ikwiinda tuleza twabana Ijipiti? (Kul. 7:12; 1 Mak. 29:12)
Andiza Inga Mwaakkomanina Ayaaya
ZIFWANIKISO IZIGWASYILIZYA BANA KWIIYA BBAIBBELE
Leza Watuma Musa ku Egepita
Nkaambo nzi Farao ncaatakabaswiilila ba Musa a Aroni. Ino nzintu nzi zibyaabi zyakatobela?
