YAJNI ja Moisés kʼot ja bʼa Egipto, xcholo yabʼ ja sbʼankil Aarón sbʼaja senya jumasaʼ. Yajni ja Moisés sok ja Aarón sjeʼa yile ja israʼelenyoʼik ja senyaʼiki, spetsanile skʼuʼane ja Jyoba tini ay smok ja Moisés sok ja Aarón.

Anto ja Moisés sok ja Aarón waj skʼumuke ja faraón. Ti yalawe yabʼa: «Jyoba ja sDyos ja israʼelenyo wa xyala: “Aʼakan awajuk ja jchonabʼi oxe kʼakʼu, bʼa oj skʼuluke jun kʼin bʼa keʼna”». Pe ja faraón yala: «Ja keʼn mi xnaʼa sbʼaj ja Jyoba. Mini oj kakan awajuk ja israʼelenyoʼiki».

Ja faraón jel tajki yujni ja israʼelenyoʼiki wa skʼanawe oj spile tyempo ja bʼa yaʼtele bʼa oj skʼuluke ja skʼineʼi. Ja yuj, tarega stʼena bʼa oj aʼtuke tsats lek. Ja israʼelenyo jumasaʼ yawe smuluk ja Moisés yuj ja ixta wa x-iljiyeʼi, ja yuj ja Moisesi och stristeʼil. Pe ja Jyoba yala yabʼ ja Moisés mok chamskʼujol, yala: «Ojni jkʼuluk ja faraón a-sjek ja jchonabʼi».

Yajkʼachil ekʼele ja Moisés sok ja Aarón waj skʼumuke ja faraón. Ja ekʼele it skʼulane jun senya. Aarón sjipa bʼa luʼum ja snajbʼanteʼ, soka it pax jun niwan bʼitsʼbʼichan. Pe chomajkil ja skʼintanum ja faraón sjipawe bʼa luʼum ja sbʼajeʼi sok ja snajbʼanteʼeʼi chʼak paxuke bʼitsʼbʼichan. Pe ¡ila! Ja sbʼitsʼbʼichan ja Aarón naki wan sbʼukjel koʼ ja sbʼitsʼbʼichane ja skʼintanum ja faraón. Anima jachuk ja faraón mini sijpan ja israʼelenyoʼiki.

Ja yuj kʼot ja tyempo ja Jyoba oj ya snebʼ ja faraón jun jasunuk. ¿Wan maʼ xa naʼa jasunkiluka? Ya jak lajune desgrasya ma niwak wokolik ja bʼa Egipto.

Jitsan ekʼele ja faraón sjekani spayjel ja Moisés yajni koʼta jitsan desgrasya bʼa Egipto, sok wa xyala yabʼi: «Axa tejkʼajuk ja desgrasya sok ojxa kakan awajuke ja israʼelenyo». Pe yajni ja desgrasya wa xtejkʼaji, ja yeʼn mixa cha xjekwani. Pe ja bʼa lajuneʼi ja yeʼn sjekaxani ja israʼelenyoʼiki.

¿Wan maʼ xa naʼa sbʼaj jujune ja bʼa lajune desgrasya koʼ sbʼaj ja Egipto? Aʼekʼuk ja slam ja juʼuni sok la kiltik.