TAIM Moses i go bek long Isip, em i tokim brata bilong em Aron long ol dispela mirakel. Na taim Moses na Aron i wokim ol dispela mirakel long ai bilong ol Israel, ol i bilip olsem Jehova i stap wantaim tupela.

Bihain Moses na Aron i go lukim Fero. Ol i tokim em: ‘Jehova, God bilong ol Israel, em i tok, “Larim lain bilong mi i go lotuim mi long ples drai nating inap tripela de.” ’ Tasol Fero i bekim tok, olsem: ‘Mi no bilip long Jehova. Na mi no inap larim ol Israel i go.’

Fero i belhat, long wanem, ol Israel i laik lusim wok bilong ol na i go lotuim Jehova. Olsem na em i givim bikpela hatwok moa long ol. Ol Israel i sutim tok long Moses, olsem em asua bilong em na ol Isip i mekim nogut tru long ol, na Moses i bel hevi. Tasol Jehova i tokim em long no ken tingting planti. Em i tok: ‘Mi bai mekim na Fero bai larim lain bilong mi i go.’

Moses na Aron i go bek gen lukim Fero. Nau ol i wokim wanpela mirakel. Aron i tromoi stik bilong em i go daun na stik i tanim i kamap wanpela bikpela snek. Ol saveman bilong Fero, ol tu i tromoi stik bilong ol i go daun na ol snek i kamap. Tasol lukim! Snek bilong Aron i kaikai snek bilong ol saveman. Maski i olsem, Fero i no larim ol Israel i go.

Olsem na em taim nau bilong Jehova i mekim save long Fero. Yu save em i bin mekim wanem? Em i kamapim 10-pela bikpela hevi long Isip.

Taim wan wan bilong ol dispela hevi i kamap, Fero i singautim Moses i kam na em i tok: ‘Pinisim dispela hevi na bai mi larim ol Israel i go.’ Tasol taim hevi i pinis, Fero i senisim tingting bilong em. Em i no larim ol i go. Tasol bihain tru, taim namba 10 hevi i kamap, nau Fero i salim ol Israel i go.

Yu save long ol dispela 10-pela hevi? Opim neks pes na yu ken kisim save long ol.