ENGA Moisesi kʼuanhatsintajka Ejiptu, aiangusïndi imeri ermanuemba Aronini milagruecheri ambe. Ka enga Moisesi ka Aroni xarhatakuapka israelitechani i milagruechani, iáminduksï jakajkuspti eska Jeoba imechani jingoni jarhaspka.

Jiájkani, Moisesi ka Aroni nirasptiksï Faraonini exeni. Arhisptiksï: ‘Jeoba, Israeliri Tata Diosï uandasïndi: “Jurajku juchiti iretani tanimu jurhiatikua, parakajtsïni kómarhiaka desierturhu”’. Peru Faraoni uandaspti: ‘Ji no jakajkusïnga Jeobani. No jurajkuaka Israelini eska niuaka’.

Faraoni ikiaxapti, jimboka ireta uékasïrenga jurajkuni ánchikuarhitani para nirani Jeobani kómarhini. Jimbosï sánderu uinhamu ánchitaapti. Israelitechaksï uandaspti eskaksï Moisesini jimbosïksï xáni no sési kánhani japka, ka Moisesi kómu pʼikuarheraspti. Peru Jeoba arhispti eska no uandanhiapiringa. Uandaspti: ‘Uáka eska Faraoni jurajkuaka juchiti iretani’.

Moisesi ka Aroni nirasptiksï ménderu Faraonini exeni. Ka iásï milagruksï ma úspti. Aroni kʼuanikuspti imeri pirimuni ka kʼéri akuitsi ma úkuarhintaspti. Peru Faraoniri jánhastichajtuksï kʼuanikuspti imecheri pirimuechani ka ístuksï akuitsi úkuarhintaspti. Peru ¡exe! Aroniri akuitsi antaaxati jánhasticheri akuitsichani. Peru Faraoni útasï no jurajkuaspti israelitechani.

Ísï jimbo, niárasti jurhiatikua enga Jeoba kastigaripiringa Faraonini. ¿Mítiskiri néna úspi? Axakuspti Ejiptuni 10 plaguechani o kʼérati uandanhiatechani.

Enga na nitamani jarhaenga plaga ma, Faraoni uandajpasïrendi Moisesini ka arhisïrendi: ‘Anhaxusta ini plagani ka jurajkuaka Israelini’. Peru enga plaga anhaxurhienga, no ísï úsïrendi. Enga nitamapkia ultimu plaga, Faraoni jurajkuaspti israelitechani.

¿Mítiskiri mándani i 10 plaguechani? Mójtaku chíti pájinani ka exeauakachi nákiskiksï.